គម្រោងអភិវឌ្ឍន៍ធំៗជាច្រើនបានបន្តសកម្មភាពសាងសង់យ៉ាងសកម្មនៅតំបន់ផ្លូវ៦០

គម្រោងអភិវឌ្ឍន៍ធំៗជាច្រើនបានបន្តសកម្មភាពសាងសង់យ៉ាងសកម្មនៅតំបន់ផ្លូវ៦០

ដោយគង់ សូរិយា

        ភ្នំពេញ ចូលដល់ចុងត្រីមាសទី១ឆ្នាំ២០២០នេះ ទោះជាបញ្ហាប្រឈមផ្នែកសេដ្ឋកិច្ចកំពុងលេចឡើងក្តី ប៉ុន្តែសកម្មភាពនៃការអភិវឌ្ឍ ការសាងសង់គំរោងធំៗជាច្រើនបាននិងកំពុងបន្តយ៉ាងសកម្មនៅតាមមហាវិថីសម្តេចតេជោ ឬផ្លូវ៦០ម៉ែត្រ។

បច្ចុប្បន្នគំរោងលំនៅដ្ឋាន ខុនដូ និងមជ្ឈមណ្ឌលពាណិជ្ជកម្មធំៗជាច្រើនបាននិងកំពុងសាងសង់នៅតំបន់នេះរួចហើយ ដែលអនាគតតំបន់នេះនឹងមានការរីកចម្រើនលឿ​ន​និងក្លាយជាមជ្ឈមណ្ឌលពាណិជ្ជកម្ម និងលំនៅដ្ឋានកាន់តែរសរវើក និងកាន់តែទាក់ទា ញការចាប់អារម្មណ៍។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកច្រឹក សុខនីមបានថ្លែងឲ្យដឹងនាពេលថ្មីៗនេះថា បច្ចុប្បន្នតំបន់នេះស្ថិតនៅកណ្តាលក្រុ​ង​​រួចទៅហើយ និងជាតំបន់មានការអភិវឌ្ឍន៍លឿន ដោយសារទីតាំងមានភាពអំណោយ​ផលកៀកនឹងកណ្តាលរាជធានី និងជាតំបន់ថ្មី ដែលងាយស្រួលរៀបចំហេដ្ឋារចនាសម្ព័ន្ឋ ក៏ដូចជាហេដ្ឋារចនាសម្ព័ន្ឋមេធំៗមួយចំនួនបានរៀបចំល្អប្រសើររួចហើយ។

លោកបន្តថា “តំបន់នេះក្នុងរយៈពេល៥ឆ្នាំខាងមុខ នឹងក្លាយជាតំបន់ដ៏ពេញនិយម​សម្រាប់ការរស់នៅ និងការធ្វើពាណិជ្ជកម្ម”។លោកបន្តថា “វានឹងក្លាយជាតំបន់ដ៏រសរវើក​មួយនាពេលអនាគត”។

បច្ចុប្បន្នផ្សារទំនើបធំៗចំនួនពីរ បាននិងកំពុងសាងសង់ គំរោងខុនដូR&F, Urban illage ផ្សារទំនើបរបស់បុរីប៉េង ហួត ផ្សារទំនើបរបស់ក្រុមហ៊ុនជីព ម៉ុងលែនដ៏ និងផ្សារទំនើបAEON MALL3នឹងសាង​សង់នៅតំបន់នេះនាពេលខាងមុខ។

ប្រធានសមាគមអ្នកជំនាញអចលនទ្រព្យកម្ពុជាលោកស្រីចេវ សុឃុនបានមានប្រសាស​ន៍ថា គ្រប់ទិសទាំងអស់នៅរាជធានីភ្នំពេញ សុទ្ឋតែមានការអភិវឌ្ឍលឿន និងក្នុងទម្រង់ខុសៗគ្នា ប៉ុន្តែសម្រាប់តំបន់ភាគខាងត្បូងក្រុងភ្នំពេញ ពិសេសផ្លូវ៦០ម៉ែត្រជាតំបន់មានការ​អភិវឌ្ឍលឿន និងតម្លៃដីធ្លីបានកើនឡើងខ្ពស់រួចទៅហើយ។

លោកស្រីបន្តថា ហេតុផល​ដែលតម្លៃដីធ្លីឡើងខ្ពស់នៅតំបន់នេះ ដោយសារទី១ វាមានចម្ងាយជិតបើសិនជាចូលមក​កាន់កណ្តាលក្រុង ទី២វាជាទីក្រុងថ្មី និងកំពុងទាក់ទាញការវិនិយោគពីអ្នកវិនិយោគជាតិ អន្តរជាតិ និងទី៣ ហេដ្ឋារចនាសម្ព័ន្ឋ និងការតភ្ជាប់ពីតំបន់នេះទៅកាន់ព្រលានយន្តហោះ ក៏ជិត និងកៀកនឹងកណ្តាលក្រុង។

លោកបន្តថា “រយៈពេល៣ទៅ៥ឆ្នាំខាងមុខ វានឹងក្លាយជាមជ្ឈមណ្ឌលពាណិជ្ជកម្ម​ដ៏ធំមួយ និងជាទីក្រុងថ្មីមួយដែលមានភាពរសរវើក តែបើគិតរយៈពេល៥ទៅ១០ឆ្នាំខាងមុខ គឺយើងសម្លឹងទៅកាន់តំបន់ស្របតាមបណ្តោយផ្លូវជាតិលេខ៦អា និងផ្លូវជាតិលេខ៥”។លោកបន្តថា “តំបន់នានានៃទិសទាំង៤របស់រាជធានីមានការអភិវឌ្ឍន៍ដូចគ្នា តែលឿន​ឬយឺត វាអាស្រ័យលើពេលវេលា ហើយតម្លៃអចលនទ្រព្យក៏នៅធូរថ្លៃផងដែរ បើធៀបនឹង​តំបន់មានការអភិវឌ្ឍលឿន”។

         រដ្ឋាភិបាលតាមរយៈរដ្ឋបាលក្រុងភ្នំពេញ បាននិងកំពុងរៀបចំផែនការអភិវឌ្ឈន៍តំបន់ភាគខាងត្បូងរាជធានីភ្នំពេញជាតំបន់បៃតង។ បច្ចុប្បន្នរដ្ឋបាលក្រុងភ្នំពេញបាននិងកំពុងសហការជាមួយសាលាក្រុងប៉ារីសប្រទេសបារាំង ដើម្បីសិក្សាពីប្រព័ន្ឋហេដ្ឋារចនាស​ម្ព័ន្ឋនានា ដូចជាផ្លូវ ប្រព័ន្ឋលូ ប្រព័ន្ឋរំដោះទឹកជំនន់ជាដើម ដើម្បីធ្វើយ៉ាងណាបញ្ចៀស​វិបត្តិហេដ្ឋារចនាសម្ព័ន្ឋនិងលំហូរចរាចរនាពេលអនាគត ដោយសារតែតំបន់ភាគខាងត្បូង​មានមនុស្សរស់នៅកាន់តែច្រើននារយៈពេល៥ទៅ១០ឆ្នាំខាងមុខ៕

The post គម្រោងអភិវឌ្ឍន៍ធំៗជាច្រើនបានបន្តសកម្មភាពសាងសង់យ៉ាងសកម្មនៅតំបន់ផ្លូវ៦០ appeared first on Best Real Estate News in Cambodia.

Source: Real Estate – property area