គួរទិញដី ឬទិញផ្ទះ បើអ្នកមានប្រាក់ចំណូលមធ្យម ?
ប្រធានបទ “ទិញដី ឬទិញផ្ទះ” នៅតែជាការសម្រេចចិត្តមួយដែលពិបាក នៅពេលយើងមានកញ្ចប់ថវិការនៅមានកម្រិត។ គួរទិញ ឬទិញផ្ទះឬយ៉ាងណានោះ ហេតុផលខាងក្រោមនេះ ជាចំណុចដែលអ្នកអាចពិចារណាបាន។
អ្នកជំនាញវិស័យអចលនទ្រព្យជាច្រើន បានលើកទឹកចិត្តអ្នកឱ្យទិញដីទុកសម្រាប់សាងសង់ផ្ទះ បើសិនជាអ្នកមានប្រាក់ចំណូលស្ថិតក្រោម $1,000។
ចំណុចល្អមួយនៃការទិញដីមុននោះ អ្នកអាចមានឱកាសសម្រេចចិត្តជ្រើសរើសប្រភេទម៉ូតផ្ទះ និងការឌីគ័រទៅតាមអ្វីដែលអ្នកស្រឡាញ់ លើដីដែលមានស្រាប់ ខណៈពេលដែលតម្លៃដីអាចហុចផល និងមានតម្លៃកើនទ្វេគុណក្នុងរយៈពេល៥ ទៅ ១០ឆ្នាំទៀត។
យ៉ាងណាមិញ ដីវិនិយោគក៏មានប្រភេទដីទៅតាមអត្ថប្រយោជន៍នីមួយៗរបស់វាដែរ។
យោងតាម លោកបណ្ឌិត គឹម ហ៊ាង អគ្គនាយកក្រុមហ៊ុន KW Cambodia ប្រភេទដីត្រូវបានបែងជា៤ប្រភេទ៖ ដីទេសចរណ៍ ដីឧស្សាហកម្ម ដីលំនៅដ្ឋាន និងដីកសិកម្ម។ ប្រភេទដីនីមួយៗវាមានចំណុចវិជ្ជមានរៀងៗខ្លួន ប្រសិនបើលោកអ្នកចង់វិនិយោគដីដែលឆាប់ទទួលបានប្រាក់ចំណេញ លោកអ្នកគួរតែវិនិយោគដីប្រភេទលំនៅដ្ឋាន ដែលជាប្រភេទដីទុកសម្រាប់សាងសង់លំនៅដ្ឋានបែបបុរី ខុនដូ និងផ្ទះល្វែងជាដើម។
ទន្ទឹមនេះ លោក អ៊ា ចរិយា នាយកក្រុមហ៊ុន AP Real Estate មានប្រសាសន៍ថា វាជាការពិតមិនអាចប្រកែកបាន ប្រសិនបើវិនិយោគដីហើយចង់បានផលចំណេញត្រលប់មកវិញ ក្រុងភ្នំពេញនៅតែជាអាទិភាពក្នុងការវិនិយោគ។ អំឡុងពេលវិបត្តិកូវីដយ៉ាងណាក្តី តម្លៃដីមិនបានឡើង ប៉ុន្តែក៏មិនបានធ្លាក់តម្លៃអ្វីឡើយ។
ក្នុងរយៈពេលពីរឆ្នាំក្រោយពីការរងគ្រោះដោយសារវិបត្តិកូវីដ ១៩ ទីផ្សារទិញលក់ហាក់មានសន្ទុះងើបត្រឡប់មកវិញ ដែលយើងអាចគិតគូរបាន។ ប៉ុន្តែបើមានចំណូលទាប តើគួរទិញឬអត់?
លោក ង៉ែត ជូ អ្នកជំនាញសេដ្ឋកិច្ចបានផ្ដល់ដំបូន្មានថា បើអ្នកចង់ទិញផ្ទះក្នុងក្ដីសុបិន គួរប្រើប្រាស់រូបមន្ត ៣០/៣០/៣ ដែលបានន័យថា មុននឹងទិញផ្ទះ អ្នកគួរមានប្រាក់សន្សំឱ្យបាន ៣០% នៃតម្លៃផ្ទះសរុបជាមុនសិន រីឯ ៣០% ទៀត សំដៅលើចំនួនទឹកប្រាក់បង់រំលស់គួរមានត្រឹម ៣០% នៃប្រាក់ចំណូលប្រចាំខែរបស់អ្នក។
ចំណុចចុចក្រោយ អ្នកគួរទិញផ្ទះណាដែលមានតម្លៃត្រឹម ៣ដងនៃប្រាក់ចំណូលប្រចាំឆ្នាំរបស់អ្នក។ ឧទាហរណ៍ថា អ្នកមានចំណូលប្រចាំឆ្នាំ ១០,០០០ដុល្លា នោះតម្លៃផ្ទះអ្នកចង់ទិញ គួរមានត្រឹម ៣០,០០០ដុល្លាទើបប្រសើរ។
លោក ច្រឹក សុខនីម អគ្គនាយកក្រុមហ៊ុន Century 21 មេគង្គ បានផ្ដល់យោបល់ថា ៖ « ការទិញផ្ទះទុកនេះ សំខាន់បើខ្ចីលុយពីធនាគារនោះ វាផ្តល់លទ្ធភាពល្អសម្រាប់ពួកគាត់អាចទិញផ្ទះបាន តែផលវិនិយោគដែលបានមកវិញមិនច្រើនទេ ។ ទោះបីយ៉ាងណា យើងជួលឱ្យអ្នកមានតម្រូវការនោះ យើងនឹងទទួលបានចំណូលប្រចាំខែ ហើយអាចយកទៅទប់ទល់នឹងការប្រាក់ដែលខ្ចីពីធនាគារបាន » ។
នាពេលបច្ចុប្បន្ន គម្រោងអភិវឌ្ឍន៍ខ្លះ អនុញ្ញាតិឱ្យអតិថិជនរបស់ខ្លួនបង់រំលស់ជាមួយជាមួយគម្រោងរហូតដល់ ១០០%ក្ដី ប៉ុន្តែអត្រាការប្រាក់អាចនឹងមានខ្ពស់ចន្លោះពី 10 – 12% ឯណោះ ខណៈពេលអត្រាការប្រាក់នៅធនាគារចន្លោះពី ៧% ទៅ ៩%។
ជារួម ការទិញផ្ទះ ឬទិញដី សុទ្ធតែមានចំណុចល្អ និងអវិជ្ជមានរៀងៗខ្លួន ដ្បិតថា ប្រសិនបើអ្នកមានផ្ទះស្រាប់ អ្នកអាចនឹងងាយស្រួលលក់ចេញជាងដី ប៉ុន្តែបើដីនោះស្ថិតក្នុងតំបន់គម្រោងអភិវឌ្ឍន៍ ដីនោះអាចនឹងស្រួលលក់ចេញជាងផ្ទះ៕
លោកអ្នកអាចស្វែងទិញ លក់ ជួលអចលនទ្រព្យជាង40,000 តាមរយៈគេហទំព័រ ឬកម្មវិធីក្នុងទូរស័ព្ទរបស់ Harbor Property ដោយសេរីនិងឥតគិតថ្លៃ៕