វិស័យអចលនទ្រព្យផ្ដើមរើបឡើងវិញបណ្ដើរៗ បន្ទាប់ពីការបើកប្រទេសឡើងវិញ
បច្ចុប្បន្នភាព ជំងឺកូវីដ១៩នៅកម្ពុជាឃើញថាមានស្ថានភាពកាន់តែប្រសើរ ដោយសារយុទ្ធសាស្រ្តចាក់វ៉ាក់សាំងរបស់រាជរដ្ឋាភិបាល និងការចូលរួមចំណែករបស់ប្រជាពលរដ្ឋក្នុងការគោរពតាមគោលការណ៍ជារួម។ ជាក់ស្តែង បន្ទាប់ពីមានការឆ្លងចូលសហគមន៍នៃព្រឹត្តិការណ៍២០កុម្ភៈ ដែលជាហេតុធ្វើឲ្យមានការប្រកាសអាសន្នបិទប្រទេសទាំងមូលធ្វើឲ្យមានការលំបាកក្នុងជីវភាពប្រចាំថ្ងៃរបស់ប្រជាពលរដ្ឋ ជាពិសេសវិស័យសេដ្ឋកិច្ចបានដើរថយក្រោយ។
រូបភាព៖ Future Southeast Asia
ទោះជាយ៉ាងណា កម្ពុជាបានត្រៀមខ្លួន និងរៀបចំផែនការដើម្បីទប់ស្កាត់ភ្លាមៗមិនបង្អង់ ដោយមានយុទ្ធសាស្រ្តការចាក់វ៉ាក់សាំង និងវិធានការរបស់ក្រសួងសុខាភិបាល៣កុំ៣ការពារជាគោល ដែលយុទ្ធនាការនេះបានសម្រេចគោលដៅវិជ្ជមានគួរឲ្យកត់សំគាល់។ កម្ពុជាបានសម្រេចលទ្ធផលដែលលើសពីការស្មាន ជាក់ស្តែងកម្ពុជាបានប្រកាសបិទបញ្ចប់ព្រឹត្តិការណ៍ជំងឺកូវីដ១៩ ឆ្លងក្នុងសហគមន៍២០កុម្ភៈកាលពីពេលថ្មីៗ។
គិតត្រឹមថ្ងៃទី១៦ ខែមករា ឆ្នាំ២០២២ លទ្ធផលនៃការចាក់វ៉ាក់សាំងនៅក្នុងប្រទេសកម្ពុជា សម្រាប់ប្រជាជនសរុប១៦លាននាក់សម្រេចបាន៨៩,៤៣%។
រូបភាព៖ mlvt.gov.kh
យោងតាមរបាយការណ៍របស់ធនាគារពិភពលោក ចេញផ្សាយនៅថ្ងៃទី១៦ ខែធ្នូ ឆ្នាំ២០២១ បានឲ្យដឹងថា សេដ្ឋកិច្ចរបស់កម្ពុជានឹងងើបឡើងវិញក្នុងឆ្នាំ២០២១ បន្ទាប់ពីរងការប៉ះទង្គិចខ្លាំងពីការរាតត្បាតជំងឺជាសាកល។
លោក ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងនៅក្នុងសន្និសីទកាសែតថា កំណើនសេដ្ឋកិច្ចកម្ពុជាក្នុងឆ្នាំ២០២១កើនឡើងក្នុងសញ្ញាណវិជ្ជមានលើសពី២,៤%។
ក្រោយពីការបើកប្រទេសឡើងវិញ លោក ផាន់ ផល្លា បានបន្តទៀតថាសកម្មភាពសេដ្ឋកិច្ចមានការកើនឡើង និងល្អប្រសើរ ដោយក្នុងឆ្នាំ២០២៤សេដ្ឋកិច្ចកម្ពុជានឹងត្រលប់មករកស្ថានភាពដើមវិញគឺរង្វង់៧% ខណយុទ្ធនាការចាក់វ៉ាក់សាំងរបស់រាជរដ្ឋាភិបាលធ្វើឡើងដោយទាន់សភាពការ។
រូបភាព៖ Future Southeast Asia
ចំណែកឯវិស័យអចលនទ្រព្យយើងសង្កេតឃើញថា បន្ទាប់ពីបើកប្រទេសឡើងវិញកាលពីដើមខែវិច្ឆិកា ឆ្នាំ២០២១កន្លងទៅ សកម្មភាពជួញដូរវិស័យអចលទ្រព្យហាក់មិនទាន់មានអ្វីប្រែប្រួលខ្លាំងនោះទេ។ លោក សំ សុខនឿន ប្រធានសមាគមអចលនទ្រព្យសកលបានឲ្យដឹងថា “រយៈកាលប៉ុន្មានខែចុងក្រោយនេះបន្ទាប់ពីបើកប្រទេសវិញ សកម្មភាពទិញលក់អចលនទ្រព្យមានកំណើនបន្តិចបន្តួច ចំណែកឯតម្លៃវាមិនមានការប្រែប្រួលអ្វីនោះទេ”។
ចំណែកឯ លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានឲ្យដឹងថា តម្រូវការអចលនទ្រព្យ ភាគច្រើនគឺវិនិយោគិនក្នុងស្រុក ដោយឡែកវិនិយោគិនក្រៅស្រុកនៅមានកម្រិតនៅឡើយ។
រូបភាព៖ Future Southeast Asia
លោកបន្តថា តម្រូវការជួលទីតាំងសម្រាប់បើកអាជីវកម្មពីសំណាក់វិនិយោគិនក្នុងស្រុកឃើញថាមានសកម្មភាពតែមិនទាន់ខ្លាំងនៅឡើយទេ ពីព្រោះតែលំហូរអ្នកវិនិយោគចូលមកកម្ពុជានៅតែមានកម្រិតនៅឡើយ។ លោកបានសង្កត់ធ្ងន់ថា ក្នុងឆ្នាំ២០២២នេះ អ្នកវិនិយោគក្នុងស្រុកគឺពិតជាដើរតួនាទីយ៉ាងសំខាន់ក្នុងការអភិវឌ្ឍន៍វិស័យអចលនទ្រព្យរបស់ប្រទេសកម្ពុជា៕
តាមដានព័ត៌មានផ្សេងៗទាក់ទងនឹងការអភិវឌ្ឍន៍ ជាពិសេសវិស័យអចលនទ្រព្យ សូមចូលទៅកាន់គេហទំព័រ Harbor property និងកម្មវិធីទូរសព្ទដៃដោយសរី៕
អំពីសេវាកម្ម ឬចម្ងល់ផ្សេងៗសូមទំនាក់ទំនងយើងខ្ញុំតាមរយៈ៖
Hotline: 096 7876 902 (Telegram)/ 066 886633
WeChat: HB066886633