ដល់.ក ! លក់ដីព្រៃលិចទឹកបានលុយជាងកន្លះលានដុល្លារត្រូវ ACU ទម្លាយ
អង្គភាពប្រឆាំងអំពើពុករលួយ ហៅកាត់ ACU បានរកឃើញថា ស្នងការរងនគរបាលខេត្តកំពង់ឆ្នាំលោកឧត្តមសេនីយ៍ ស៊ុំ សុជាតិ បានកាន់កាប់ និងទន្ទ្រានដីចំនួនជិត១ពាន់ហិកតា នៅតំបន់ដីព្រៃលិចទឹកជុំវិញបឹងទន្លេសាប ហើយធ្វើការលក់ដូរបានប្រាក់ជាង៥១ម៉ឺនដុល្លារឯណោះ ។
តាមប្រភពរបាយការណ៍នៃកិច្ចប្រជុំលើកទី៧របស់ក្រុមប្រឹក្សាជាតិប្រឆាំងអំពើពុករលួយបានឱ្យដឹងថា វរៈសេនីយ៍ឯក កែវ ណារុន ប្រធានការិយាល័យអន្តរាគមន៍ និងតម្រួតបទបញ្ជា នរគបាលខេត្តកំពង់ឆ្នាំង និងឧត្តមសេនីយ៍ត្រី ស៊ុំ សុជាតិ ស្នងការរងនគរបាលខេត្តកំពង់ឆ្នាំង មានជាប់ពាក់ព័ន្ធបទល្មើសធំៗចំនួន៣ក្នុងនោះរួមមាន ៖ទី១-បំផ្លាញដោយចេតនា និងគៃបំបាត់ដោយទុច្ចរិត, ទី២-ឈូសឆាយ និងហ៊ុមព័ន្ធដីព្រៃលិចទឹក និងទី៣-បទមិនប្រកាសទ្រព្យសម្បត្តិ និងបំណុល ។
តាមប្រភពអង្គភាពប្រឆាំងអំពើពុករលួយបានរកឃើញថា ឈ្មោះ ស៊ុំ សុជាតិ បានលក់ដីព្រៃលិចទឹកតំបន់៣ ចំនួន ៨លើក បានលុយជាង ៥១ម៉ឺនដុល្លារ ។ ហើយក្នុងរបាយការណ៍របស់ ACU បានឱ្យដឹងទៀតថា ឧត្តមសេនីយ៍ស្នងការរង ស៊ុំ សុជាតិ បានកាន់កាប់ និងទន្ទ្រានដីចំនួន៣៨ទីតាំងមានទំហំជិត ១០០០ហិកតា (៩៥២,០២ហិកតា) ដោយឈ្មោះនេះបានធ្វើលិខិតប្រគល់ដីជូនរដ្ឋវិញចំនួនត្រឹមតែ ៦៧៨ហិកតាប៉ុណ្ណោះ ។ ជាងនេះទៅទៀត អង្គភាពប្រឆាំងអំពើពុករលួយរកឃើញថា ឈ្មោះ ស៊ុំ សុជាតិ នៅត្រូវរងនូវបទល្មើសថែមមួយទៀតគឺបទសម្អាតប្រាក់ ។
គួររំលឹកផងដែរថា អង្គភាពប្រឆាំងអំពើពុករលួយធ្លាប់បាននាំខ្លួនលោកឧត្តមសេនីយ៍ត្រី ស៊ុំ សុជាតិ ស្នងការរងនគរបាលខេត្តកំពង់ឆ្នាំង និងលោក កែវ ណារុន ប្រធានការិយាល័យអន្តរាគមន៍ នៃស្នងការដ្ឋាននគរបាលខេត្តកំពង់ឆ្នាំងទៅសាកសួរពាក់ព័ន្ធករណីកាន់កាប់ដីព្រៃលិចទឹកតំបន់៣នៅស្រុកកំពង់លែង ខេត្តកំពង់ឆ្នាំង ៕