ការសិក្សា៖ ប្រជាជនកម្ពុជាវ័យក្មេងចាប់អារម្មណ៍លើវិស័យអចលនទ្រព្យនៅឆ្នាំ២០១៩នេះ
ការសិក្សា៖ ប្រជាជនកម្ពុជាវ័យក្មេងចាប់អារម្មណ៍លើវិស័យអចលនទ្រព្យនៅឆ្នាំ២០១៩នេះ
ដោយ វុត្ថា
ភ្នំពេញ: គេហទំព័រ Realestate.com.kh បានធ្វើការស្ទង់មតិអំពីវិស័យអចលនទ្រព្យនៅក្នុងឆ្នាំ២០១៩ ជាមួយនឹងអ្នកចូលរួមផ្តល់ចម្លើយ ប្រមាណជាង ២,០០០នាក់ ក្នុងនោះមានជនជាតិខ្មែរ៧៣.៤% និងជនជាតិចិនមាន២៣ % និងក្រៅពីនេះជាជនជាតិផ្សេងៗ។
យោងតាមការស្ទង់មតិនេះ បានផ្សព្វផ្សាយកាលពីកន្លងមថ្មីៗនេះឪ្យដឹងថា មនុស្សវ័យក្មេងចាប់ផ្តើម ចាប់អារម្មណ៍លើវិស័យអចលនទ្រព្យ បើប្រៀបធៀបនឹងការស្ទង់មតិកាលពីឆ្នាំ២០១៨ អ្វីដែលគួរឲ្យចាប់អារម្មណ៍នោះចំនួនយុវជន ដែលមានអាយុ២០ឆ្នាំឬក្មេងជាងនេះបានកើនឡើង។
តាមការសិក្សាកាលពីឆ្នាំមុនបានរកឃើញថា យុវជនក្នុងវ័យនេះមានចំនួនត្រឹមតែ ០.៥% ប៉ុណ្ណោះ ប៉ុន្តែត្រឹមរយៈពេល តែមួយឆ្នាំប៉ុណ្ណោះចំនួននេះកើនឡើង២.៨% នៅក្នុងឆ្នាំ២០១៩។ ការកើនឡើងនៃចំនួនយុវជនដ៏ច្រើននេះ បណ្តាលមកពីការរីកចម្រើននៃវិស័យអប់រំ ដែលធ្វើឲ្យយុវជនចាប់ផ្តើមគិតគូរ ពីការវិនិយោគតាំងពីនៅវ័យក្មេង។ ចំពោះផ្នែកផ្សេងៗ គេឃើញមានការប្រែប្រួលតែបន្តិចបន្តួចប៉ុណ្ណោះ។
យោងតាមរបាយការណ៍ស្រាវជ្រាវឆ្នាំ២០១៩ នេះបានបង្ហាញថាបើទោះបីជាតម្លៃអចលនទ្រព្យ នៅក្នុងប្រទេសកម្ពុជាមានការកើនឡើងក៏ដោយ ចម្លើយជាងពាក់កណ្តាល បញ្ជាក់ថាតម្លៃនេះអាចទទួលយកបាន។ ប៉ុន្តែបើប្រៀបធៀបនឹងរបាយការណ៍ឆ្នាំ២០១៨ គេសង្កេតឃើញថាចំនួនអ្នកដែលគិតថា តម្លៃអចលនទ្រព្យអាចទទួលយកបាននេះបានធ្លាក់ចុះ ហើយចំនួនអ្នកដែលគិតថាតម្លៃនេះ (ថ្លៃ) មិនអាចទទួលយកបានមានការកើនឡើង។
ទោះបីជាយ៉ាងណាក៏ដោយគេនៅតែជឿថា តម្លៃអចលនទ្រព្យនឹងបន្តនៅតែកើនឡើងហើយការវិនិយោគនឹងមានសភាពថេរ។
លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ដឹងថា វិស័យអចនទ្រព្យនៅក្នុងប្រទេសកម្ពុជា ទាំងការទិញលំនៅឋាន ដីឡូត៍ និងការវិនិយោគលើអគារផ្សេង ពុំមានសញ្ញាណាធ្លាក់ចុះនោះទេសម្រាប់ឆ្នាំ២០១៩នេះ ព្រោះតម្រូវការនៅតែមាន។
លោកបន្តថា “តម្រូវការលើវិស័យអចលនទ្រព្យភាគច្រើន គឺជាវ័យក្មេង ជាពិសេសអ្នកដែលទើបរៀបការហើយថ្មីថ្មោង”។ លោកបន្ថែមថា “តម្រូវការនេះនឹងនៅតែបន្តការកើនឡើង សម្រាប់ឆ្នាំទៅមុខៗទៀត”៕
The post ការសិក្សា៖ ប្រជាជនកម្ពុជាវ័យក្មេងចាប់អារម្មណ៍លើវិស័យអចលនទ្រព្យនៅឆ្នាំ២០១៩នេះ appeared first on Best Real Estate News in Cambodia.
Source: Real Estate – property area