កំពង់ផែទឹកជ្រៅនៅខេត្តកោះកុងសាងសង់សម្រេចបាន ៩០ភាគរយ ដែលនឹងជំរុញការអភិវឌ្ឍខេត្តធ្លាប់ដាច់ស្រយាលនេះ
កំពង់ផែទឹកជ្រៅនៅខេត្តកោះកុងសាងសង់សម្រេចបាន ៩០ភាគរយ ដែលនឹងជំរុញការអភិវឌ្ឍខេត្តធ្លាប់ដាច់ស្រយាលនេះ
ដោយ វុត្ថា
ភ្នំពេញៈ អភិបាលខេត្តកោះកុងបានឱ្យដឹងថា ការសាងសង់កំពង់ផែទឹកជ្រៅនៅក្នុងខេត្តកោះកុង រហូតមកដល់ពេលនេះសម្រេចបាន៩០ភាគរយ ដែលធ្វើឥ្យសកម្មភាពពាណិជ្ជកម្ម និងការអភិវឌ្ឍនៅខេត្តនេះកាន់តែមានភាពសកម្ម និងរីកចម្រើន។
លោកស្រី មិថុនា ភូថង អភិបាលខេត្តកោះកុងបានឱ្យដឹងកាលពីពេលថ្មីៗនេះថា បន្ថែមពីនេះខាងក្រុមហ៊ុន បាននឹងកំពុងសាងសង់ក្នុងកម្រិតជម្រៅទឹក១២ម៉ែត្រ អាចនាំចេញនូផលិតផលបានចំនួន៥ម៉ឺនតោន និងមានគម្រោងសាងសង់រហូតដល់ ១៤ម៉ែត្របន្ថែមទៀត១០ ម៉ឺនតោននាពេលខាងមុខនេះ។ លោកស្រីបន្តថា ក្រៅពីនេះ ខេត្តកោះកុងក៏មានកំពង់ផែរបស់ក្រុមហ៊ុនលីយ៉ុងផាត់ (LYP Group) ក៏បាននឹងកំពុងសាងសង់នៅក្បែរនោះដែរដែលមានជម្រៅ១២ ម៉ែត្របន្ថែមទៀត ដែលធ្វើឱ្យខេត្តមួយនេះកាន់តែមានសក្តានុពលកាន់តែខ្ពស់ក្នុងការនាំទំនិញទៅកាន់ទីផ្សារបរទេស។
លោកស្រីបន្ថែមទៀតថា ប្រមុខរាជរដ្ឋាភិបាលសម្តេចតេជោ កាលពីកន្លងទៅថ្មីៗនេះ បានប្រកាសពីគម្រោងសាងសង់ផ្លូវជាតិលេខ១០ ដោយតភ្ជាប់ខេត្តកោះកុង ពោធិសាត់ និងបាត់ដំបង ព្រមទាំងគម្រោងពង្រីកផ្លូវលេខ ៨ ថែមទៀតក្នុងន័យពង្រីកសេដ្ឋកិច្ច និង ពាណិជ្ជកម្ម។
ក្រុមហ៊ុន Tianjing UNION Development Group របស់ចិនបានបោះទុនវិនិយោគរាប់រយលានដុល្លារសាងសង់កំពង់ផែទឹកជ្រៅអន្តរជាតិ និងក្រុងវិស្សមកាលទេសចរណ៍កាលពីកន្លងមកនេះ ដើម្បីរួមចំណែកលើកកម្ពស់វិស័យទេសចរណ៍ សេដ្ឋកិច្ច និងពាណិជ្ជកម្ម នៅក្នុងប្រទេសកម្ពុជា។
គិតទល់បច្ចុប្បន្ន ក្រុមហ៊ុននេះបានកំពុងសម្រុកអនុវត្តន៍គម្រោង ទៅតាមផែនការ ដោយបានបណ្តាក់ទុនវិនិយោគចំនួនជាង ១,៥០០លានដុល្លារហើយ លើការសាងសង់អគារ និងហេដ្ឋារចនាសម្ព័ន្ធចាំបាច់មួយចំនួនរួមមាន ប្រព័ន្ធគមនាគមន៍ ក្លឹបវាយកូនហ្គោល ព្រលានយន្តហោះ កំពង់ផែទឹកជ្រៅអន្តរជាតិ សួនលម្អ បណ្តាញទឹកស្អាត និងប្រព័ន្ធអគ្គិសនី ជាដើម។
លោកវ៉ាស៊ីម សូរិយា អ្នកនាំពាក្យក្រសួងសាធារណៈការ និងដឹកជញ្ជូនធ្លាប់់បានមានប្រសាសន៍ថា ការសាងសង់ផ្លូវជាតិលេខ១០ មិនត្រឹមតែជួយធ្វើសមាហរណកម្មផ្ទៃក្នុងកម្ពុជានោះទេ ប៉ុន្តែហេដ្ឋារចនាសម្ព័ន្ឋនេះ ក៏ជួយដឹកជញ្ជូនកសិផលពីខេត្តបាត់ដំបង ពោធិសាត់ ទៅកាន់កំពង់ផែដែលសម្រួលដល់ការនាំចេញរបស់កម្ពុជា ទៅកាន់ប្រទេសទី៣ ដោយកាត់បន្ថយការពឹងផ្អែកប្រទេសជិតខាងកម្ពុជា។
លោកបន្តថា “ការសាងសង់ហេដ្ឋារចនាសម្ព័ន្ឋមានសារៈសំខាន់ណាស់ ដើម្បីជួយសម្រួលនិងជំរុញកំនើនសេដ្ឋកិច្ចកម្ពុជាបន្ថែមទៀត”៕
The post កំពង់ផែទឹកជ្រៅនៅខេត្តកោះកុងសាងសង់សម្រេចបាន ៩០ភាគរយ ដែលនឹងជំរុញការអភិវឌ្ឍខេត្តធ្លាប់ដាច់ស្រយាលនេះ appeared first on Best Real Estate News in Cambodia.
Source: Real Estate – property area