ក្រសួងដែនដីប្រកាសតែងតាំងប្រធានមន្ទីរដែនដីថ្មីប្រចាំខេត្តកំពត
ក្រសួងដែនដីប្រកាសតែងតាំងប្រធានមន្ទីរដែនដីថ្មីប្រចាំខេត្តកំពត
ដោយ ៖ រ៉ាណេត
កំពត ៖ ក្រសួងរៀនចំដែនដី នគរូបនីយកម្ម និងសំណង់ បានប្រកាសតែងតាំង និងផ្ទេរភារកិច្ចប្រធានមន្ទីររៀបចំដែនដី នគរូបនីយកម្ម និងសំណង់ខេត្តកំពត ក្រោមវត្តមានរបស់លោក ឆាន់ សាផានរដ្ឋ រដ្ឋលេខាធិការប្រចាំការក្រសួងរៀបចំដែនដី នគរូបនីយកម្ម និងសំណង់ ។
នៅសាលប្រជុំសាលាខេត្តកំពត កាលពីថ្ងៃទី២៣ ខែធ្នូ ឆ្នាំ២០១៩នេះ មានការរៀបចំពិធីប្រកាសតែងតាំង និងផ្ទេរភារកិច្ចប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពត ក្រោមវត្តមានរបស់លោក ឆាន់ សាផាន រដ្ឋលេខាធិការប្រចាំការនៃក្រសួងរៀបចំដែនដី នគរូបនីយកម្ម និងសំណង់ លោក ជាវ តាយ អភិបាលខេត្តកំពត រួមជាមួយមន្ត្រីក្រោមឱវាទជាច្រើននាក់។
យោងប្រកាសលេខ១៧៨.ដនស.ប្រក ចុះថ្ងៃចន្ទ ៥រោច ខែមិគសិរ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៦ ខែធ្នូ ឆ្នាំ២០១៩ មានខ្លឹមសារថា ត្រូវបានតែងតាំងលោក ដាញ់ សារី ជាប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពត ជំនួសលោក យិន វុឌ្ឍ ដែលត្រូវបានផ្ទេរភារកិច្ចទៅបម្រើការនៅទីស្តីការក្រសួងរៀបចំដែនដី នគរូបនីយកម្ម និងសំណង់។
លោក ឆាន់ សាផាន រដ្ឋលេខាធិការប្រចាំការនៃក្រសួងរៀបចំដែនដី នគរូបនីយកម្ម និងសំណង់បានមានប្រសាសន៍ថា មន្ត្រីជំនាញស្ថិតក្នុងក្របខ័ណ្ឌរដ្ឋត្រូវប្រើប្រាស់ពេលវេលាឱ្យបានសមរម្យស្របតាមច្បាប់ដែលបានកំណត់។ មានន័យថាក្នុងនាមខ្លួនជាអ្នកធ្វើការងារ និងទទួលប្រាក់បៀវត្សរ៍របស់រដ្ឋបែរជាទៅបម្រើការឱ្យក្រុមហ៊ុនដោយទុកកិច្ចការទាំងឡាយឱ្យនៅរាំងស្ទះរហូតបង្កការលំបាកដល់ប្រជាពលរដ្ឋដែលត្រូវពឹងពាក់នោះឡើយ។
លោក ជាវ តាយ អភិបាលខេត្តកំពតក៏បានមានប្រសាសន៍ផងដែរថា ប្រធានមន្ទីរទើបទទួលតំណែងថ្មីត្រូវបន្តធ្វើកិច្ចការដែលនៅសេសសល់ ដេីម្បីបម្រើប្រជាពលរដ្ឋឱ្យបានល្អ ពិសេសការផ្តល់ប័ណ្ណកម្មសិទ្ធិជាលក្ខណៈប្រព័ន្ធជូនប្រជាពលរដ្ឋស្របតាមគោលនយោបាយរបស់រាជរដ្ឋាភិបាលលើកិច្ចការងារដីធ្លី៕
The post ក្រសួងដែនដីប្រកាសតែងតាំងប្រធានមន្ទីរដែនដីថ្មីប្រចាំខេត្តកំពត appeared first on Best Real Estate News in Cambodia.
Source: Real Estate – property area