ក្រសួងបដិសេធជុំវិញព័ត៌មានផ្អាកដំណើរការគម្រោងស្ថាបនាកំណាត់ផ្លូវជាតិលេខ៥
ក្រសួងបដិសេធជុំវិញព័ត៌មានផ្អាកដំណើរការគម្រោងស្ថាបនាកំណាត់ផ្លូវជាតិលេខ៥
ដោយ ៖ នៅ ស៊ីវុត្ថា
ភ្នំពេញ ៖ ក្រសួងសាធារណៈការ និងដឹកជញ្ជូន បានប្រកាសបដិសេធចំពោះការបំផ្លើសព័ត៌មានជុំវិញថា ក្រសួងបានផ្អាកគម្រោងស្ថាបនាផ្លូវជាតិលេខ៥ (ព្រែកក្តាម-ធ្លាម្អម)។
នៅក្នុងសេចក្តីបំភ្លឺរបស់ក្រសួងសាធារណៈការ និងដឹកជញ្ជូនបានចេញផ្សាយនៅថ្ងៃទី ២៥ ខែវិច្ឆិកា ឆ្នាំ២០១៩ នេះបានបញ្ជាក់ថា គម្រោងស្ថាបនាផ្លូវជាតិលេខ៥ (ព្រែកក្តាម-ធ្លាម្អម) ដំណើរការធម្មតាស្របតាមផែនការដែលបានគ្រោងទុក។
សេចក្តីបំភ្លឺដដែលបន្តថា ក្រសួងសូមធ្វើការឆ្លើយបំភ្លឺករណី ការលើកឡើងពីសំណាក់មតិមួយចំនួន ចំពោះគម្រោងស្ថាបនាកំណាត់ផ្លូវជាតិលេខ៥ ភាគខាងត្បូងចាប់ពីព្រែកក្តាម (ខេត្តកណ្តាល) ទៅដល់ធ្លាម្អម (ខេត្តពោធិ៍សាត់) បានផ្អាកដំណើរការការអនុវត្តការងាររបស់ខ្លួន។
បច្ចុប្បន្ន ក្រុមការងារបានយកចិត្តទុកដាក់ខ្ពស់ និងខិតខំប្រឹងប្រែងធ្វើការងារដោយមិនគិតថ្ងៃឈប់សំរាកក្នុងការស្ថាបនាផ្លូវជាតិលេខ៥ ភាគខាងត្បូងនេះ។ លើសពីនេះទៅទៀតការសាងសង់ក៏បានអនុវត្តតាមស្តង់ដាគុណភាព សុវត្ថិភាព និងបច្ចេកទេសសាងសង់ក្រោមការចុះពិនិត្យ តាមដាន អង្កេត និងវាយតម្លៃជាប្រចាំរបស់ភ្នាក់ងារសហប្រតិបត្តិការអន្តរជាតិជប៉ុន JICA ។
ក្រសួងស្នើសុំការសហការ និងអធ្យាស្រ័យពីបងប្អូនប្រជាពលរដ្ឋ ក្នុងករណីមានផលប៉ះពាល់ដែលកើតមានឡើងអំឡុងពេលសាងសង់នេះ។
ក្រសួងសាធារណការ និងដឹកជញ្ជូន បានចាប់ផ្តើមអនុវត្តគម្រោងធ្វើឲ្យប្រសើរឡើងផ្លូវជាតិលេខ៥ ចាប់ពីព្រែកក្តាម ទៅធ្លាម្អម ក្នុងស្រុកក្រគរ ខេត្តពោធិ៍សាត់ ចាប់តាំងពីដើមឆ្នាំ២០១៨ ដោយគ្រោងចំណាយថវិកាប្រមាណ២៤៦លានដុល្លារអាមេរិក។
ការងារអភិវឌ្ឍន៍គម្រោងធ្វើឲ្យប្រសើឡើង កំណាត់ផ្លូវជាតិលេខ៥ មួយខ្សែនេះត្រូវបានត្រួតពិនិត្យបទដ្ឋានបច្ចេកទេសដោយក្រុមហ៊ុន Katahira & Engineers International (KEI)។ ចំណែកការចំណាយក្នុងការសាងសង់ ស្ថិតនៅក្រោមជំនួយឥណទានសម្បទានពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុនប្រចាំនៅកម្ពុជា ហៅកាត់ថា JICA។
កំណាត់ផ្លូវជាតិលេខ៥ ព្រែកក្តាម-ធ្លាម្អម មានប្រវែង១៣៥.២៥គម ជាប្រភេទផ្លូវ AC (Asphalt Concrete) ហើយដំណើរការសាងសង់មានរយៈពេល៤ឆ្នាំ ដោយចែកចេញជាបីកំណាត់ កំណាត់ផ្លូវ ទី១ មាន ប្រវែង ៤១,៥៤ គ.ម កំណាត់ផ្លូវទី ២ មានប្រវែង៤២,៥០ គ.ម និងកំណាត់ផ្លូវទី ៣ មានប្រវែង ៥១,២០ គ.ម។
គម្រោងផ្លូវនេះ ជាចំណែកមួយនៃផ្លូវអាស៊ានហាយវេលេខ១ ដែលតភ្ជាប់ពីប្រទេសមីយ៉ាន់ម៉ា ថៃ កម្ពុជា និងវៀតណាម ហើយជាផ្លូវសេដ្ឋកិច្ចយ៉ាងសំខាន់ សម្រាប់ការដឹកជញ្ជូនផលិតផលកសិកម្ម ពោលគឺកំណាត់ផ្លូវនេះ ជាសរសៃឈាមដ៏ធំមួយក្នុងការធ្វើឲ្យសេដ្ឋកិច្ចជាតិកាន់តែមានការអភិវឌ្ឍថែមទៀត៕
The post ក្រសួងបដិសេធជុំវិញព័ត៌មានផ្អាកដំណើរការគម្រោងស្ថាបនាកំណាត់ផ្លូវជាតិលេខ៥ appeared first on Best Real Estate News in Cambodia.
Source: Real Estate – property area