ក្រុមហ៊ុន KW Cambodia គ្រោងពង្រីកការិយាល័យ ១០០កន្លែងទូទាំងប្រទេស ដើម្បីឆ្លើយតបការរីកចម្រើនវិស័យអចលនទ្រព្យនៅកម្ពុជា
ក្រុមហ៊ុន KW Cambodia គ្រោងពង្រីកការិយាល័យ ១០០កន្លែងទូទាំងប្រទេស ដើម្បីឆ្លើយតបការរីកចម្រើនវិស័យអចលនទ្រព្យនៅកម្ពុជា
ដោយ ប៊ី
ភ្នំពេញៈ ក្រុមហ៊ុនអចលនទ្រព្យលំដាប់ពិភពលោក Keller Williams ឬ KW Cambodia គ្រោងនឹងបើកការិយាល័យភ្នាក់ងាររបស់ខ្លួន១០០ទីតាំង ដែលដែលនឹងប្រមូលដោយភ្នាក់ងារជំនាញប្រមាណ៧,០០០នាក់ ក្នុងរយៈពេល ១០ឆ្នាំខាងមុខ ដើម្បីឆ្លើយតបនឹងភាពរីកចម្រើន នៃវិស័យអចលនទ្រព្យនៅទូទាំងប្រទេសកម្ពុជា។
លោកឧកញ៉ាបណ្ឌិតគីម ហ៊ាង អគ្គនាយកក្រុមហ៊ុន KW Cambodia បានមានប្រសាសន៍ឲ្យដឹងកាលពីល្ងាចថ្ងៃទី២៣ ខែធ្នូកន្លងមកថា គោលដៅរបស់ក្រុមហ៊ុន KW Cambodia នឹងប្រមូលផ្តុំភ្នាក់ងារអចលនទ្រព្យ និងបើកការិយាល័យជាច្រើនកន្លែង ដើម្បីឆ្លើយតបនឹងការរីកលូតលាស់នៃអចលនទ្រព្យ។
លោកឧកញ៉ាបានថ្លែងថា “ចក្ខុវិស័យរបស់យើង គឺក្នុងរយៈពេល១យើងនឹងបើក ការិយាល័យឱ្យបាន១០០ ទីតាំង។ គោលដៅរបស់យើងគឺបើកគ្រប់ខណ្ឌ គ្រប់ខេត្ត គ្រប់ស្រុក ដែលត្រូវតែមានវត្តមានរបស់យើង”។ លោកបន្ថែមថា “ដូច្នេះយើងកំណត់ថា យើងនឹងបើក១០០ទីតាំងនៅទូទាំងប្រទេស ហើយនឹងប្រមូលភ្នាក់ងាររបស់យើង ឱ្យបានយ៉ាងតិចបំផុត ៧,០០០នាក់”។
លោកបានបន្តថា នៅពេលដែលយើងមានអវត្តមាននៅគ្រប់ខេត្ត ក្រុង ហើយមានមនុស្ស៧,០០០នាក់ វាមានន័យគាត់(អតិថិជន) ប្រើតែមនុស្សម្នាក់គឺមាន១០០ ការិយាល័យ និងមនុស្ស៧,០០០នាក់ចាំលក់ឱ្យគាត់។ ឧទាហរណ៍ គាត់ចង់លក់កន្លែងក៏ដោយនៅទូទាំងកម្ពុជា គឺមាន៧,០០០នាក់ចាំលក់ឱ្យគាត់ ហើយមានទីតាំងចំាលក់ឱ្យគាត់ ដូច្នេះវាលឿន ហើយអ្នកប្រើប្រាស់សេវារបស់ KW Cambodia ថ្ងៃក្រោយនឹងសេវាលឿន និងមានប្រសិទ្ធិភាព។
លោកឧកញ៉ាបណ្ឌិតគីម ហ៊ាងបានឱ្យដឺងទៀតថា “យើងមានមនុស្ស៧,០០០ ពាន់នាក់ និង១០០ទីតាំង។ អតិថិជនចង់ទិញ និងលក់ យើងមានសេវាជួនគាត់ភ្លាមៗតែម្តង។ អត្ថប្រយោជន៍ នៅពេលដែលយើងមានទំហំធំ យើងមានគ្នាច្រើន គឺធ្វើកិច្ចការបានលឿន”។
ក្នុងរយៈពេល១០ក្រោយ ពោលគឺនៅឆ្នាំ២០២៨ ក្រុមហ៊ុន KW Cambodia នឹងបង្កើតឱ្យមាន១០០ ទីតាំង ហើយភ្នាក់ងារយើងចំនួន៧, ០០០នាក់។ នេះជាទស្សនៈវិស័យរួមរបស់ក្រុមហ៊ុន ខណៈជំហ៊ានបន្ទាប់របស់ក្រុមហ៊ុន នឹងឈានចូលក្នុងផ្សារហ៊ុននៅកម្ពុជាផងដែរ។
បច្ចុប្បន្នក្រុមហ៊ុន KW Cambodia មាន៩សាខា និងមានអនុសាខាចំនួន៥។ ក្នុងសាខាចំនួន៩មានសាខានៅភ្នំពេញចំនួន ៦ នៅខណ្ឌទួលគោក ខណ្ឌជ្រោយចង្វារ ខណ្ឌឬស្សីកែវ ខណ្ឌសែនសុខ ខណ្ឌដង្កោ និងខណ្ឌពោសែនជ័យ។ តាមបណ្តាខេត្ត ក្រុមហ៊ុនមាន ៣សាខា រួមសាខាខេត្តបាត់ដំបង សៀមរាប និងកំពង់ស្ពឺ។
ក្រុមហ៊ុនក៏មានអនុសាខាចំនួន៥រួមមាន អនុសាខានៅក្រុងបាវិត អនុសាខាក្រុងតាខ្មៅ អនុសាខាក្រុងកៀនស្វាយ អនុសាខាក្រុងប៉ោយប៉ែត និងអនុសាខាទីរួមខេត្តកំពត។
ក្រៅពីវត្តមានក្រុមហ៊ុន KW Cambodia នៅកម្ពុជា បច្ចុប្បន្នក៏មានក្រុមហ៊ុនភ្នាក់ងារអចលនទ្រព្យជាច្រើនបាន និងកំពុងប្រកួតប្រជែងគា្ន ដើម្បីបណ្តើមយកចំណែកទីផ្សារអចលនទ្រព្យនៅកម្ពុជា។
លោកឧកញ៉ាបណ្ឌិតគីម ហ៊ាងបានថ្លែងថា “ការដែលមានការប្រកួតប្រជែងជារឿងល្អ ព្រោះវាធ្វើមនុស្សយើងមានរឹងមាំជាងមុន ហើយខ្ញុំសប្បាយចិត្ត នៅពេលមានមនុស្សជាច្រើនប្រឡូក ហើយរំពឹងថា វានឹងធ្វើឱ្យវិស័យនេះកាន់តែរឹងមាំ ហើយអ្នកដែលមានវិជ្ជាជីវៈពិតប្រាកដឈរជើងបាន ហើយអ្នកមានកម្រិតស្ទើៗប្រឈមនឹងបរាជ័យ ព្រោះវាទីផ្សារសេរី”។
បើសិនក្រឡេកមើលកាលពី២០មុន វិស័យដីធ្លីមិនសូវជាមានដំណើរ មិនមានអ្នកណាចូលមកក្នុងទីផ្សារទេ ហើយអ្នករកស៊ីដីធ្លីក៏សូវមាន ហើយបរទេសក៏អត់សូវមកដែរ តែដល់ពេលឥឡូវនេះ វិស័យដីមានកើនឡើង បរទេសចូលមកច្រើន ខ្មែរក៏ច្រើន ដូច្នេះវិស័យដីធ្លី អាចរកថវិការបានច្រើន ដែលធ្វើឱ្យមានការចូលរួមច្រើនក្នុងវិស័យនេះ។
លោកឧកញ៉ាបានបន្តថា “បានបធម្មតានៅទីផ្សារមួយដំណើរការ មានមនុស្សជាច្រើនចូលមក។ វាមានន័យថា បើស្រះទឹកមានត្រី មនុស្សជាច្រើនមកចាប់។ នៅប្រទេសយើង វិស័យដីធ្លីជាវិស័យដែលរុញច្រាន ដោយវិស័យសេដ្ឋកិច្ចដែលរីកចម្រើនខ្លាំង ដូច្នេះការរីកចម្រើនខ្លាំងនេះ ធ្វើឱ្យក្រុមហ៊ុនជាច្រើនឈានជើងចូលក្នុងទីផ្សារ”។
លោកឱ្យដឹងទៀតថា “ជាមួយនឹងការឈានចូលទីផ្សារដីធ្លី មានអ្នកខ្លះក៏បរាជ័យ មានអ្នកខ្លះក៏ជោគជ័យ ដូច្នេះមានតែអ្នកខ្លាំង អ្នកពូកែ មានវិជ្ជាជីវៈដែលអ្នកដណ្តើមទីផ្សារបាន”។
លោកបានបន្តថា “គ្មានអ្នកណាចង់ធ្វើខុសទេ ដូច្នេះការងាររបស់យើងគឺប្រមូលពួកគាត់ដាក់ចូលក្នុង KW Cambodia ហើយយើងបង្រៀនគាត់ អប់រំគាត់ ថែទាំគាត់ និងគ្រប់គ្រងពួកគាត់ឱ្យធ្វើតាមយើង ដូច្នេះថ្ងៃក្រោយពួកគាត់នឹងធ្វើបានត្រឹមត្រូវ”៕
The post ក្រុមហ៊ុន KW Cambodia គ្រោងពង្រីកការិយាល័យ ១០០កន្លែងទូទាំងប្រទេស ដើម្បីឆ្លើយតបការរីកចម្រើនវិស័យអចលនទ្រព្យនៅកម្ពុជា appeared first on Best Real Estate News in Cambodia.
Source: Real Estate – property area