ក្រុមហ៊ុន Morgan Ford បោះទុន ៦០០ លានដុល្លារ សាងសង់ខុនដូរកម្ពស់ ៦៩ជាន់នៅជ្រោយចង្វារ
ក្រុមហ៊ុន Morgan Ford បោះទុន ៦០០ លានដុល្លារ សាងសង់ខុនដូរកម្ពស់ ៦៩ជាន់នៅជ្រោយចង្វារ
ដោយ ៖ វុត្ថា
ភ្នំពេញ ៖ ក្រុមហ៊ុន ម័រហ្គេន ហ្វត (Morgan Ford) របស់ចិន បានសម្រេចបោះទុនវិនិយោគប្រមាណ៦០០លានដុល្លារអាមេរិក ក្នុងការសាងសង់អគារខុនដូរថ្មីមួយទៀត និងទំនើបអស្ចារ្យ កម្ពស់ ២២០ម៉ែត្រ និង ៦៩ ជាន់ នៅជ្រោយចង្វារដែលមានកន្លែងចតឧទ្ធម្ភាគចក្រផងដែរ។
លោក Ding Yongjun អគ្គនាយកក្រុមហ៊ុន ម័រហ្គេន ហ្វត បានឱ្យដឹងនៅក្នុងពិធីបញ្ចុះបឋមសិលាបើកការដ្ឋានសាងសង់អគារ ម័រហ្គេន អេនមៃសិន (Morgan En Maison) កាលពីចុងសប្តាហ៍កន្លងទៅនេះថា អគារខុនដូរនេះមានកម្ពស់ ២២០ម៉ែត្រ ស្មើ៦៩ជាន់ មានទីតាំងស្ថិតនៅលើដងទន្លេមេគង្គ ក្នុងខណ្ឌជ្រោយចង្វារ រាជធានីភ្នំពេញ។
លោកបន្តថា “អគារខុនដូរនេះនេះសរុបមានចំនួន៥ ជាអក្សរ យូ (U) នៅលើផ្ទៃដីសរុប ២,៤ ហិកតា។ អគារទាំងអស់មានផ្ទៃក្រឡាសរុបជាង ៤០ម៉ឺនម៉ែត្រការ៉េ”។
លោក ហោ ណាំហុង ឧបនាយករដ្ឋមន្ត្រី បានវាយតម្លៃខ្ពស់ចំពោះការសាងសង់អគារខ្ពស់ៗកប់ពពកនៅរាជធានីភ្នំពេញ និងជាការការចូលរួមចំណែកក្នុងការអភិវឌ្ឍវិស័យសំណង់ និងបានលើកសម្រស់សោភ័ណភាព និងបង្កើនឱកាសការងារកាន់តែច្រើនឡើងជូនដល់ប្រជាជនកម្ពុជា។
លោកឧបនាយករដ្ឋមន្ត្រីបន្តថា “គម្រោងអគារនេះ គឺជាការចូលរួមចំណែកដ៏ធំរបស់ក្រុមហ៊ុន ម័រហ្គេន លើវិស័យសាងសង់នៅកម្ពុជា”។ លោកបន្តថា ក្រុមហ៊ុននេះបានផ្តល់អត្ថប្រយោជន៍យ៉ាងច្រើនក្នុងការវិនិយោគនៅកម្ពុជា ហើយបានរួមចំណែកក្នុងការបង្កើនឱកាសការងារដល់កម្មករកម្ពុជា។
គម្រោងក្រុមហ៊ុន Morgan Ford កន្លងមកជាច្រើន តាំងពីឆ្នាំ២០០៨ រហូតដល់ឆ្នាំ២០១៨ លើគម្រោងនានាជាច្រើន។
បើតាមការគ្រោងទុករបស់ក្រុមហ៊ុន អគារនេះនឹងបញ្ចប់ការសាងសង់នៅឆ្នាំ ២០២២ ខាងមុខនេះ ហើយនឹងបង្កើតការងារជាច្រើនកន្លែងជូនដល់ប្រជាពលរដ្ឋកម្ពុជា។
អគ្គនាយកក្រុមហ៊ុនអចលនទ្រព្យ Khmer Foundation Appraisal (KFA) លោកឧកញ៉ា នួន រិទ្ធី បានឱ្យដឹងថា បច្ចុប្បន្នបន្ទាប់ពីក្រុងភ្នំពេញ ដែលជាទីក្រុងចាស់ ខណ្ឌជ្រោយចង្វារនេះហើយដែលជាតំបន់ ដែលមានសក្ដានុពល និងកំពុងទាក់ទាញការវិនិយោគច្រើន។ លោកបន្តថា ជាក់ស្ដែងពេលនេះគឺមានគម្រោងសាងសង់ទីក្រុងរណបមួយចំនួនរួចទៅហើយ ដូចជាគម្រោងទីក្រុងរណបរបស់ក្រុមហ៊ុន OCIC និងទីក្រុងរណបរបស់ទីក្រុងលី យ៉ុងផាត់ រួមជាមួយនឹងភាពល្អប្រសើរដែលផ្លូវក្រវ៉ាត់ក្រុង ក៏ស្ថិតនៅក្នុងខណ្ឌជ្រោយចង្វារផងដែរ។
អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភ័ក្តី ធ្លាប់បានមានប្រសាសន៍ថា តំបន់ជ្រោយចង្វារត្រូវបានចាត់់ចូលជាតំបន់លំនៅដ្ឋាននៅក្នុងផែនការអភិវឌ្ឍន៍ក្រុងភ្នំពេញឆ្នាំ២០១៥-២០៣០ ដែលបានអនុម័តកាលពីឆ្នាំ២០១៥ដោយប្រមុខរដ្ឋាភិបាល។ លោកបន្តថា “វាស័ក្តិសមជាតំបន់លំនៅដ្ឋាន ដោយសារតំបន់់នេះមានទន្លេព័ទ្ឋជុំវិញ ដែលអំណោយផលដល់ការរស់នៅ មានខ្យល់អាកាសចេញចូលប្រកបដោយផាសុខភាព”។លោកបន្តថា “អាជ្ញាធរក្រុងនឹងមិនអនុញ្ញាត្តឲ្យមានរោងចក្រ សហគ្រាសវិនិយោគនៅតំបន់នេះទេ”៕
The post ក្រុមហ៊ុន Morgan Ford បោះទុន ៦០០ លានដុល្លារ សាងសង់ខុនដូរកម្ពស់ ៦៩ជាន់នៅជ្រោយចង្វារ appeared first on Best Real Estate News in Cambodia.
Source: Real Estate – property area