គម្រោងសាងសង់ផ្លូវជាតិលេខ៧១C គ្រោងនឹងបើកការដ្ឋាននៅត្រឹមចុងឆ្នាំនេះជាមួយនឹងការតភ្ជាប់ឆ្លងទន្លេដ៏សំខាន់
គម្រោងសាងសង់ផ្លូវជាតិលេខ៧១C គ្រោងនឹងបើកការដ្ឋាននៅត្រឹមចុងឆ្នាំនេះជាមួយនឹងការតភ្ជាប់ឆ្លងទន្លេដ៏សំខាន់
ដោយៈ រ៉ាណេត
ភ្នំពេញៈ បន្ទាប់ពីបានបញ្ចប់ការសិក្សាលម្អិត ពីសំណាក់ក្រុមហ៊ុនជំនាញចិន គម្រោងបើកការដ្ឋានសាងសង់ផ្លូវជាតិលេខ ៧១C តភ្ជាប់រវាងខេត្តត្បូងឃ្មុំ និងខេត្តកំពង់ចាម ដោយឆ្លង់កាតស្ពានមិត្តភាព កម្ពុជា -ចិន ស្រុកស្ទឹង និងស្រុកក្រូចឆ្មារ នឹងប្រព្រឹត្តទៅនៅត្រឹមចុងឆ្នាំ២០១៩ឆាប់ៗខាងមុខនេះ។
អ្នកនាំពាក្យក្រសួងសាធារណៈការ និងដឹកជញ្ជូន លោក វ៉ា ស៊ីមសូរិយា បានមានប្រសាសន៍ឱ្យដឹងតាមទូរស័ព្ទ កាលពីសប្ដាហ៍កន្លងទៅនេះថា គម្រោងសាងសង់ផ្លូវជាតិលេខ ៧១C ដែលមានប្រវែង១១៤,៦៨ គីឡូម៉ែត្រ តភ្ជាប់ចេញពីផ្លូវជាតិលេខ៧១ ត្រង់ចំណុចផ្សារចំការលើ ស្រុកចំការលើ ខេត្តកំពង់ចាម ឆ្លងកាត់ស្ពានស្ទឹងត្រង់-ក្រូចឆ្មារ ទៅកាន់ភូមិសាស្ត្រខេត្តត្បូងឃ្មុំ ត្រូវបានបញ្ចប់ការសិក្សារួចរាល់ហើយ នៅឡើយតែចាប់ផ្តើមស្ថាបនាប៉ុណ្ណោះ។
លោកបានបន្តទៀតថា គម្រោងសាងសង់ផ្លូវជាតិ៧១C នេះ ត្រូវបានសិក្សាដោយក្រុមហ៊ុន សៀងហៃគ្រុប ហើយក៏ជាគម្រោងមួយស្ថិតនៅក្នុងគម្រោងអាទិភាពចុងក្រោយក្នុងចំណោមគម្រោងផ្លូវផ្សេងៗទៀត ដែលបានដាក់ចេញដោយក្រសួងផងដែរ។
បើតាមការឱ្យដឹងពីលោក ទី សេងដឿន មន្ត្រីសាលាស្រុកក្រូចឆ្មារ ខេត្តត្បូងឃ្មុំ បានបង្ហើបប្រាប់ឱ្យដឹងថា នៅក្នុងគម្រោងនៃការសាងសង់ផ្លូវជាតិមួយខ្សែ ខាងលើនេះ នឹងត្រូវស្ថាបនាទ្រូងផ្លូវទំហំ១២ម៉ែត្រ ខណៈដែលផ្លូវរងឬផ្លូវបំបែកចូលភូមិ ឃុំនឹងត្រូវស្ថាបនាទំហំ៩ម៉ែត្រ។ លោកបានបន្តទៀតថា តាមការសិក្សា គម្រោងសាងសង់ផ្លូវជាតិលេខ៧១C នឹងត្រូវចំណាយពេលប្រមាណ៣៦ខែ នៅក្នុងខ្ទង់ថវិកាចំណាយសរុបប្រមាណជាង ១០០លានដុល្លារ។
លោកបានបញ្ជាក់ថា ទីតាំងគោលនៃផ្លូវដែលត្រូវបំបែកចេញពីផ្សារចំការលើ ខេត្តកំពង់ចាម មួយនេះនឹងត្រូវមកបញ្ចប់នៅតំបន់សាលាខេត្តត្បូងឃ្មុំ ស្ថិតនៅក្នុងភូមិត្រពាំងជូរ ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ និងមានផ្លូវខ្នែងមួយខ្សែទៀតឆ្ពោះទៅតភ្ជាប់ជាមួយផ្លូវជាតិលេខ៧៣៕
The post គម្រោងសាងសង់ផ្លូវជាតិលេខ៧១C គ្រោងនឹងបើកការដ្ឋាននៅត្រឹមចុងឆ្នាំនេះជាមួយនឹងការតភ្ជាប់ឆ្លងទន្លេដ៏សំខាន់ appeared first on Best Real Estate News in Cambodia.
Source: Real Estate – property area