គម្រោងហេដ្ឋារចនាសម្ព័ន្ធធំៗជាច្រើននឹងត្រូវសម្ពោធបើកការដ្ឋានសាងសង់នៅ ឆ្នាំ២០២០ខាងមុខ
គម្រោងហេដ្ឋារចនាសម្ព័ន្ធធំៗជាច្រើននឹងត្រូវសម្ពោធបើកការដ្ឋានសាងសង់នៅ ឆ្នាំ២០២០ខាងមុខ
ដោយ វុត្ថា
ភ្នំពេញ៖ រដ្ឋាភិបាលតាមរយៈក្រសួងសាធារណៈការ និងដឹកជញ្ជូន នឹងសម្ពោធបើកការដ្ឋានសាងសង់ និងដាក់ឱ្យដំណើរប្រើប្រាស់ជាផ្លូវការនូវគម្រោងហេដ្ឋារចនាសម្ព័ន្ធធំៗជាច្រើននៅដើមឆ្នាំ ២០២០ខាងមុខនេះ។
លោក គង់ វិមាន អ្នកនាំពាក្យក្រសួងសាធារណៈការ និងដឹកជញ្ជូន បានប្រាប់គេហទំព័រ propertyarea.asia នៅថ្ងៃទី ២៣ ខែវិច្ឆិកា ឆ្នាំ ២០១៩ នេះថា ខណៈពេលនេះ ក្រុមការងាររបស់ក្រសួង បានបញ្ចប់ការសិក្សាលើកគម្រោងស្ថាបនាផ្លូវ ស្ពាន ហើយដែលត្រូវសម្ពោធបើកការដ្ឋានសាងសង់ និងផែនការដាក់ឱ្យដំណើរការជាផ្លូវការជាច្រើនគម្រោងផងដែរនៅឆ្នាំ ២០២០ ខាងមុខនេះ បន្ទាប់ពីទទួលបានការអនុញ្ញាតពីរដ្ឋាភិបាល។
លោកបន្តថា នៅឆ្នាំ ២០២០ខាងមុខនេះ មានគម្រោងហេដ្ឋារចនាសម្ព័ន្ធជាច្រើនដែលបានសាងសង់រួចរាល់ នឹងត្រូវសម្ពោធដាក់ឱ្យដំណើរការប្រើប្រាស់ជាផ្លូវការ និងត្រៀមសម្ពោធបើករដ្ឋានសាងសង់នូវគម្រោងសាងសង់ស្ពាន និងផ្លូវថ្មីមួយចំនួនទៀត។
លោកបន្តថា “គម្រោងទាំងនេះ បានទទួលការអនុញ្ញត និងអនុម័តពីរាជរដ្ឋាភិបាលរួចហើយ សម្រាប់គម្រោង និងផែនការឆ្នាំ ២០២០ ខាងមុខនេះ។ ចឹងទេ យើងបើកបណ្តើរ យើងបិតបណ្តើរ” ។
លោកបន្តទៀតថា ជាក់ស្តែង យើងក៏កំពុងត្រៀមសម្ពោធបើករដ្ឋានផ្លូវជាតិលេខ១០ ដែលជាផ្លូវអតិត ១៥៥៥ នៅក្នុងឆ្នាំ ២០២០ខាងមុខនេះផងដែរ ដែលផ្លូវនេះតភ្ជាប់ពីខេត្តកោះកុង មកក្រុងពោធិ៍សាត់ ។ ក្រុមការងារបានចុះធ្វើការកិច្ចការនេះ ជាងមួយឆ្នាំមកហើយ។
លោក ស៊ុន ចាន់ថុល ទេសរដ្ឋមន្ត្រី និងរដ្ឋមន្ត្រីក្រសួងសាធារណៈការ និងដឹកជញ្ជូនធ្លាប់បានឱ្យដឹងថា ពិធីបើកការដ្ឋានស្ថាបនាផ្លូវជាតិលេខ១០នេះ នឹងត្រូវធ្វើឡើងរួមគ្នានឹងពិធីសម្ពោធឲ្យប្រើប្រាស់ផ្លូវជាតិលេខ៥៥ ក្រោមអធិបតីសម្ដេចនាយករដ្ឋមន្ត្រី ហ៊ុន សែន ។
ផ្លូវជាតិលេខ១០ មានប្រវែង១៩៣ គីឡូម៉ែត្រ ដែលតភ្ជាប់ចេញពីស្រុកសំឡូតនៃខេត្តបាត់ដំបង ទៅខេត្តកោះកុង ដោយឆ្លងកាត់ស្រុកវាលវែង ខេត្តពោធិ៍សាត់ ។
បើតាមលោក ស៊ុន ចាន់ថុល គម្រោងផ្លូវមួយខ្សែនេះ ទទួលបានប្រាក់កម្ចីពីរដ្ឋាភិបាលចិនប្រមាណ ១៨៣លានដុល្លារអាមេរិកសម្រាប់ការសាងសង់។ក្រៅពីផ្លូវជាតិលេខ១០ ដែលគ្រោងនឹងបើកការដ្ឋាននេះ បណ្ដាផ្លូវជាតិ និងស្ពានជាច្រើនគម្រោង ក៏នឹងត្រៀមសម្ពោធដាក់ឱ្យដំណើរការ និងកំពុងត្រូវបានយកចិត្តទុកដាក់លើកកម្ពស់ផ្លូវពីរដ្ឋាភិបាល៕
The post គម្រោងហេដ្ឋារចនាសម្ព័ន្ធធំៗជាច្រើននឹងត្រូវសម្ពោធបើកការដ្ឋានសាងសង់នៅ ឆ្នាំ២០២០ខាងមុខ appeared first on Best Real Estate News in Cambodia.
Source: Real Estate – property area