គំរោងសាងសង់ស្ពានទៅអរិយក្សត្រនៅតែមិនទាន់មានភាពច្បាស់លាស់
គំរោងសាងសង់ស្ពានទៅអរិយក្សត្រនៅតែមិនទាន់មានភាពច្បាស់លាស់
ដោយគង់ សូរិយា
ភ្នំពេញៈ ស្ពានដែលប្រជាពលរដ្ឋរស់នៅតំបន់អរិយក្សត្រ និងតំបន់ស្វាយជ្រុំស្ថិតនៅក្នុងភាពមិនប្រាកដប្រជា និងកំណត់ពេលសាងសង់ជាក់លាក់នៅឡើយ ដែលធ្វើឲ្យក្តីសង្ឃឹមសម្រាប់ប្រជាពលរដ្ឋនៅតំបន់នោះ កាន់តែចំណាយពេលរង់ចាំយូរតទៅទៀត។
លោកវ៉ា ស៊ីមសូរិយាអ្នកនាំពាក្យក្រសួងសាធារណៈការ និងដឹកជញ្ជូនបានថ្លែងឲ្យដឹងតាមទូរស័ព្ទកាលពីពេលថ្មីៗនេះថា ការសាងសង់ស្ពានភ្ជាប់រវាងផ្លូវជាតិលេខ១ ពីតំបន់ក្តីតាកុយ ទៅកាន់តំបន់អារិយក្សត្រ និងពីតំបន់ជ្រោយចង្វារទៅតំបន់ស្វាយជ្រុំនឹងមានការប្រែប្រួល ប៉ុន្តែលោកមិនបញ្ជាក់ពីភាពលំអិតនោះទេ។
លោកបន្តថា “ខ្ញុំមិនទាន់មានព៌តមានលំអិតទាក់ទងនឹងគម្រោងនេះទេ ព្រោះរហូតមកទល់ពេលនេះ មិនទាន់មានព៌តមានវិវត្តន៍ថ្មីនៅឡើយទេ”។
អគ្គនាយកបច្ចេកទេសនៃក្រសួងសាធារណៈការ និងដឹកជញ្ជូនលោកនូវឌ្ឍនៈបានថ្លែងឲ្យដឹងផងដែរថា ក្រុមហ៊ុនចិនកំពុងសិក្សា ពីទីតាំងសម្រាប់សាងសង់ស្ពាននេះ ប៉ុន្តែការកំណត់សាងសង់ជាផ្លូវការនៅពេលណា មិនទាន់កំណត់ជាក់លាក់នោះទេ ប៉ុន្តែវាជាគំរោងនាពេលអនាគត ដែលត្រូវតែសាងសង់។លោកបន្តថា គំរោងនេះមិនទាន់ស្ថិតនៅក្នុងផែនការជាក់លាក់ ឬដាក់ចូលផែនការរបស់ក្រសួងថា នឹងសាងសង់នៅពេលណានោះទេ ព្រោះយើងរង់ចាំជំនួយរបស់ប្រទេសចិន។
ក្នុងឳកាសអញ្ជើញសម្ភោធបើកឲ្យប្រើប្រាស់ មហាវិថីសម្តេចតេជោហ៊ុន សែន ដែលគេហៅរត់មាត់ថា ផ្លូវ៦០ម៉ែត្រ លោកហ៊ុន សែនបានថ្លែងថា ដើម្បីឲ្យការសាងសង់និងភ្ជាប់ផ្លូវខ្សែក្រវ៉ាត់ក្រុងពេញលេញ កម្ពុជាចាំបាច់ត្រូវសាងសង់ស្ពានភ្ជាប់រវាងតំបន់ក្តីតាកុយ ភ្ជាប់ទៅកាន់តំបន់អរិយក្សត្រ និងពីផ្លូវកែវ ចិន្តា នាតំបន់ជ្រោយចង្វារ ភ្ជាប់ទៅកាន់តំបន់ស្វាយជ្រុំ ស្ថិតក្នុងឃុំស្វាយជ្រុំ ស្រុកល្វាឯម ខេត្តកណ្តាល។
ការប្រកាសពីការសាងសង់ស្ពានទៅកាន់តំបន់នោះ បានធ្វើឲ្យតំលៃដីនៅតំបន់ទាំងនោះបានកញ្រ្ជោលឡើងយ៉ាងខ្លាំង ហើយអ្នកវិនិយោគក្នុងស្រុកមួយចំនួនបានសាងសង់បុរីមួយចំនួននៅតំបន់នោះរួចមកហើយ។
លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចនលវត្ថុកម្ពុជា បានថ្លែងថា ប្រសិនជាមានការប្រកាសសាងសង់ស្ពាន បានធ្វើឲ្យតំលៃដីធ្លីនៅតំបន់អរិយក្សត្រ និងតំបន់ស្វាយជ្រុំមានការប្រែប្រួលយ៉ាងខ្លាំង ប៉ុន្តែប្រសិនជាស្ពានពន្យាពេលសាងសង់ តំលៃអចលនទ្រព្យនៅតំបន់នោះ ក៏ទ្រុឌទ្រោមទៅតាមនោះផងដែរ។
លោកបន្តថា “ប្រសិនជាស្ពានសាងសង់កាន់តែឆាប់កាន់តែល្អ ព្រោះវានឹងធ្វើឲ្យតំបន់នោះមានការអភិវឌ្ឈន៍កាន់តែលឿន ព្រោះគំរោងមួយចំនួនដែលវិនិយោគនៅតំបន់នោះ គឺរំពឹងពីការសាងសង់ស្ពានរបស់រដ្ឋាភិបាល”៕
The post គំរោងសាងសង់ស្ពានទៅអរិយក្សត្រនៅតែមិនទាន់មានភាពច្បាស់លាស់ appeared first on Best Real Estate News in Cambodia.
Source: Real Estate – property area