តើអ្នកទិញផ្ទះគួរបង់រំលស់ជាមួយធនាគារ ឫម្ចាស់គម្រោង?
ដោយសារតែការប្រកួតប្រជែងដ៏ស្វិតស្វាញនៅក្នុងទីផ្សារអចលនទ្រព្យ ជាពិសេសក្នុងបរិបទនៃការរីករាលដាលនៃជំងឺកូវីដ-១៩ អ្នកអភិវឌ្ឍន៍អចលនទ្រព្យមួយចំនួនក្នុងប្រទេសកម្ពុជាបានផ្លាស់ប្តូរយុទ្ធសាស្ត្រលក់របស់ខ្លួនដើម្បីទាក់ទាញអ្នកទិញកាន់តែច្រើន ជាមួយនឹងការបញ្ចុះតម្លៃ ការបង់រំលោះងាយស្រួល ហើយក្នុងករណីខ្លះទិញដោយមិនចាំបាច់បង់ប្រាក់តម្កល់ជាមុន។
ជាទូទៅ វាជាតួនាទីរបស់ធនាគារ មិនមែនអ្នកអភិវឌ្ឍន៍នោះទេដែលត្រូវផ្តល់ប្រាក់កម្ចីដល់អ្នកទិញផ្ទះ។ ប្រការនេះបានចោទជាសំណួរថា តើអ្នកទិញផ្ទះនៅកម្ពុជាគួរបង់ប្រាក់កម្ចីជាមួយអ្នកអភិវឌ្ឍន៍ ឬធនាគារ បើ ពួកគេមានជម្រើស។
លោក អៀ ចរិយា អគ្គនាយកក្រុមហ៊ុន AP Real Estate មានប្រសាសន៍ថា ការទិញអចលនទ្រព្យដោយប្រើកម្ចីជាមួយអ្នកអភិវឌ្ឍន៍ ឬធនាគារអាចជាជម្រើសដ៏ល្អ ព្រោះតម្លៃអចលនទ្រព្យអាចឡើងខ្ពស់ជាងអត្រាការប្រាក់ ប៉ុន្តែវាអាស្រ័យលើប្រភេទអចលនទ្រព្យ ទីតាំង តម្លៃ ជម្រើសនៃការទូទាត់ និងអត្រាការប្រាក់ដែលផ្តល់ជូនដោយអ្នកអភិវឌ្ឍន៍ ឬធនាគារ។
លោកបានបន្ថែមថា៖ «ការបង់ប្រាក់កម្ចីទិញផ្ទះជាមួយអ្នកអភិវឌ្ឍន៍ និងធនាគារមានទាំងគុណសម្បត្តិ និងគុណវិបត្តិ។ ប្រសិនបើអ្នកជ្រើសរើសបង់រំលោះជាមួយធនាគារ អត្រាការប្រាក់ចន្លោះពី ៥ ទៅ ១០ ភាគរយក្នុងមួយឆ្នាំជាមួយហានិភ័យទាប ដោយសារតែធនាគារនឹងសិក្សាពីលទ្ធភាពនៃការសងត្រឡប់ដូចជា ចំណូលប្រចាំខែទៀតទាត់ វត្ថុបញ្ចាំ (ប្លង់រឹង) និងឯកសារពាក់ព័ន្ធផ្សេងទៀតមុនផ្តល់ប្រាក់កម្ចី។»
ទោះជាយ៉ាងណាក៏ដោយ ប្រសិនបើអ្នកជ្រើសរើសបង់ប្រាក់កម្ចីជាមួយអ្នកអភិវឌ្ឍន៍ អត្រាការប្រាក់ចន្លោះពី ៨ ទៅ ១២ ភាគរយក្នុងមួយឆ្នាំ ប៉ុន្តែអ្នកអភិវឌ្ឍន៍មិនត្រូវការបញ្ជាក់ពីប្រាក់ចំណូលប្រចាំខែ និងឯកសារផ្សេងៗទៀតពីអ្នកទេ។ ករណីនេះគឺល្អសម្រាប់ម្ចាស់អាជីវកម្មខ្នាតតូច និងអ្នកវិនិយោគដែលមិនមានប្រាក់ចំណូលប្រចាំខែទៀងទាត់ ប៉ុន្តែមានហានិភ័យខ្ពស់ដោយសារតែប្រាក់ចំណូលរបស់ពួកគេអាចឡើងចុះ។
លោក សុខ សេរី ជាម្ចាស់អាជីវកម្មអនឡាញម្នាក់នៅទីក្រុងភ្នំពេញ ដែលទើបតែទិញខុនដូមួយបន្ទប់គេងនៅបឹងកេងកង១ ហើយសម្រេចចិត្តបង់ប្រាក់រំលោះប្រចាំខែជាមួយអ្នកអភិវឌ្ឍន៍។
នៅពេលសួរថា ហេតុអ្វីបានជាគាត់ជ្រើសរើសបង់កម្ចីទិញផ្ទះជាមួយក្រុមហ៊ុនអភិវឌ្ឍន៍ លោក សេរី មានប្រសាសន៍ថា៖ «ខ្ញុំសម្រេចចិត្តបង់ប្រាក់កម្ចីជាមួយក្រុមហ៊ុនអភិវឌ្ឍន៍របស់ខ្ញុំ ព្រោះវាងាយស្រួលជាងធនាគារ។ អ្នកអភិវឌ្ឍន៍មិនទាមទារប្រាក់ចំណូលប្រចាំខែទៀងទាត់ និងឯកសារពាក់ព័ន្ធផ្សេងទៀតទេ ហើយអ្វីដែលសំខាន់ជាងនេះទៅទៀតនោះគឺថាខ្ញុំអាចចរចារមិនបង់ប្រាក់តម្កល់៣០ភាគរយជាមុន។»
លោកបានបន្ថែមថា៖ «ទោះបីជាប្រាក់ចំណូលប្រចាំខែរបស់ខ្ញុំឡើងចុះ ខ្ញុំនៅតែអាចមានលទ្ធភាពបង់ប្រាក់កម្ចីទិញផ្ទះបាន ទោះបីជាមានអត្រាការប្រាក់ខ្ពស់បន្តិចក៏ដោយ ហើយខ្ញុំអាចមានផ្ទះអចិន្ត្រៃយ៍ផ្ទាល់ខ្លួនសម្រាប់រស់នៅដោយមិនចាំបាច់បង់ថ្លៃជួលប្រចាំខែទៀតទេ។»
សម្រាប់អ្នកជំនាញអចលនៈទ្រព្យមួយចំនួន អ្នកអភិវឌ្ឍន៍អចលនៈទ្រព្យដែលអនុញ្ញាតឱ្យអតិថិជនបង់រំលោះជាមួយពួកគេ មិនមែនជាមួយធនាគារ មានហានិភ័យខ្ពស់ដែលអ្នកទិញមិនអាចបង់ប្រាក់បានថិតថេរ។
ក្នុងបទសម្ភាសជាមួយប្រព័ន្ធផ្សព្វផ្សាយក្នុងស្រុក លោក ង៉ែត ជូ អ្នកវិភាគសេដ្ឋកិច្ច និងជាអ្នកជំនាញអចលនទ្រព្យបាននិយាយថា ការបង់ប្រាក់កម្ចីទិញផ្ទះជាមួយអ្នកអភិវឌ្ឍន៍អាចប៉ះពាល់ដល់អតិថិជន ដែលខ្វះចំណេះដឹងផ្នែកហិរញ្ញវត្ថុ ដែលនាំឱ្យមានហានិភ័យខ្ពស់នៃការខកខានបង់ត្រលប់។ ជាធម្មតា អ្នកអភិវឌ្ឍន៍មិនមានជំនាញដើម្បីសិក្សាពីលទ្ធភាពហិរញ្ញវត្ថុរបស់អតិថិជនក្នុងការទូទាត់ត្រឡប់មកវិញនោះទេ។
លោកបន្តថា៖ «ដោយសារវាងាយស្រួលក្នុងការខ្ចី ដូច្នេះអតិថិជនមួយចំនួនអាចទិញផ្ទះមួយ ឬពីរ។ អតិថិជនខ្លះរំពឹងថាពេលទិញផ្ទះរួច គេអាចជួល ឫលក់ចេញវិញដោយចំណេញ។ ប៉ុន្តែ ប្រសិនបើការរំពឹងទុកនោះមិនបានដូចបំណង នោះអតិថិជនអាចនឹងមានបញ្ហាជាមួយនឹងលំហូរហិរញ្ញវត្ថុ ហើយចុងក្រោយគាត់អាចនឹងដាក់លក់អចលនទ្រព្យទៅវិញក្នុងតម្លៃក្រោមទីផ្សារ ដែលអាចជះឥទ្ធិពលទៅលើទីផ្សារទាំងមូល»។
លោកបានលើកឡើងថា វិធីល្អបំផុតគឺអតិថិជនមិនគួរប្រើកម្ចីទិញលំនៅឋានពីអ្នកអភិវឌ្ឍន៍ទេ ព្រោះមិនបានការសិក្សាពីលទ្ធភាពហិរញ្ញវត្ថុរបស់អតិថិជន ខុសពីធនាគារដែលនឹងសិក្សាពីចំណូលអតិថិជន និងធ្វើការវិនិច្ឆ័យលើហានិភ័យប្រាក់កម្ចី ជាមួយអត្រាការប្រាក់ទាប។