សម្ដេចតេជោ ហ៊ុន សែន ជំរុញឱ្យពន្លឿនការសាងសង់ផ្សារគំរូព្រំដែនចំនួន២ទៀត
សម្ដេចតេជោ ហ៊ុន សែន ជំរុញឱ្យពន្លឿនការសាងសង់ផ្សារគំរូព្រំដែនចំនួន២ទៀត
ដោយ ៖ រ៉ាណេត
ភ្នំពេញ ៖ ប្រមុខដឹកនាំប្រទេសកម្ពុជា សម្ដេចតេជោ ហ៊ុន សែន បានជំរុញឱ្យពន្លឿងសកម្មភាពសាងសង់ផ្សារគំរូនៅតំបន់ព្រំដែនសម្រាប់នាំចេញទំនិញពីកម្ពុជាចំនួន ២បន្ថែមទៀត ក្រោមការចំណាយថវិការបស់ជាតិទាំងស្រុង។
ផ្សារគំរូនៅតំបន់ព្រំដែនចំនួន២ ដែលសម្តេចតេជោ ហ៊ុន សែន ជំរុញឱ្យបង្កើនល្បឿនក្នុងការសាងសង់ខាងលើនេះ ស្ថិតនៅក្នុងខេត្តស្វាយរៀង និងខេត្តកំពត ដែលជាការទទួលបន្ទុក និងទទួលខុសត្រូវរបស់ក្រសួងពាណិជ្ជកម្ម។
មានប្រសាសន៍នៅក្នុងពិធីបើកសម្ពោធឱ្យប្រើប្រាស់ជាផ្លូវការណ៍នូវផ្សារដោះដូរទំនិញកម្ពុជា-វៀតណាម (ផ្សារគំរូព្រំដែនកម្ពុជា) លើកដំបូងនៅព្រំដែនកម្ពុជា និងវៀតណាម ស្ថិតក្នុងឃុំដារ ស្រុកមេម៉ត់ ខេត្តត្បូងឃ្មុំ កាលពីព្រឹកថ្ងៃទី២៤ ខែធ្នូ ឆ្នាំ២០១៩ សម្តេចតេជោ ហ៊ុន សែន បានបញ្ជាក់ថា “ត្រឹមការចំណាយ២លានដុល្លារជាងសម្រាប់សាងសង់ផ្សារមួយ វាមិនច្រើននោះទេ ប៉ុន្តែអ្វីដែលសំខាន់គឺការធ្វើឱ្យបានជោគជ័យ ដូច្នេះត្រូវរៀបចំគូរប្លង់ចាប់ពីពេលនេះ ហើយអជ្ញាធរខេត្តត្រូវ រៀបចំទីតាំងដោះស្រាយដីសម្រាប់សាងសង់ ហើយបើខាងលើទម្លាក់លុយឱ្យធ្វើ ហើយមិនអាចដោះស្រាយដីសាងសង់បាន កុំធ្វើចៅហ្វាយខេត្តតទៅទៀត”។
ជាមួយនឹងការជំរុញឱ្យមានការបង្កើតផ្សារដោះដូរផលិតផលគំរូចំនួន២បន្ថែមទៀត ដែលស្ថិតនៅក្នុងខេត្តស្វាយរៀង និងខេត្តកំពតនេះ សម្ដេចតេជោ ក៏បានស្នើដល់ភាគីខាងវៀតណាមបើកច្រកព្រំដែនបន្ថែមក្នុងគោលបំណងគាំទ្រ និងជំរុញការដោះដូរផលិតផលរវាងប្រទេសទាំងពីរ ដើម្បីពង្រីកវិសាលភាពទីផ្សារ បង្កើនកំណើនសេដ្ឋកិច្ចផងដែរ ៕
The post សម្ដេចតេជោ ហ៊ុន សែន ជំរុញឱ្យពន្លឿនការសាងសង់ផ្សារគំរូព្រំដែនចំនួន២ទៀត appeared first on Best Real Estate News in Cambodia.
Source: Real Estate – property area