សៀមរាបនឹងមានសួនសត្វ តម្លៃ១៨លានដុល្លារ លើផ្ទៃដី២២ហិចតា
គម្រោងសួនសត្វដ៏ធំក្នុងខេត្តសៀមរាប គឺជាការវិនិយោគដោយក្រុមហ៊ុនAngkor Wildlife and Aquarium Co Ltd បានបណ្ដាក់ទុនវិនិយោគដំណាក់កាលដំបូងចំនួន១៨លានដុល្លារអាមេរិក ដែលត្រៀមនឹងបើកឲ្យដំណើរការក្នុងខែតុលាខាងមុននេះ។
ក្រុមហ៊ុនបានចាប់ផ្ដើមការសាងសង់នៅឆ្នាំ២០២១ ហើយបច្ចុប្បន្នសម្រេចបាន៧០ភាគរយ ហើយ កំពុងបន្តដំណើរការសាងសង់ហេដ្ឋារចនាសម្ព័ន្ធចាំបាច់សម្រាប់ការអភិរក្សធនធាន ជលផល និងសត្វព្រៃ ស្ថិតក្នុងភូមិកាបោន ឃុំខ្សាច់ស ស្រុកសូទ្រនិគម។ គម្រោងសួនសត្វដ៏ធំ បង្កើតឡើងក្នុងគោលបំណងដើម្បីអប់រំ និងលើកកម្ពស់ការអភិរក្សសត្វ ក៏ដូចជាទាក់ទាញភ្ញៀវទេសចរជាតិ និងអន្តរជាតិ។
គម្រោងនេះនឹងត្រូវសាងសង់លើផ្ទៃដី១០០ហិកតា ដោយបែងចែកជាបីដំណាក់កាល។ ដំណាក់កាលដំបូងនឹងត្រូវចំណាយអស់ 18 លានដុល្លារក្នុងការវិនិយោគ លើផ្ទៃដី២២ហិចតាហើយបានចាប់ផ្តើមប្រតិបត្តិការ កាលខែឧសភា ឆ្នាំ 2021។ ចំណែកឯដំណាក់កាលទី 2 និងទី 3 នឹងរួមបញ្ចូលសួនរុក្ខសាស្ត្រ សាលតាំងពិពណ៌ កន្លែងសត្វល្មូន តំបន់កំសាន្ត ហាង និងសណ្ឋាគារលំដាប់ពិភពលោក ដែលទុនវិនិយោគសរុប៧០លានដុល្លារ។ ទាំងនេះនឹងជួយទាក់ទាញភ្ញៀវទេសចរឱ្យមកស្នាក់នៅក្នុងខេត្តសៀមរាបបានយូរ។
សូមជំរាបជូនថា ក្រុមហ៊ុនមានបំណងស្នើសុំគោលការណ៍នាំចូលប្រភេទសត្វព្រៃចំនួន ០៨ ប្រភេទ ស្មើនឹង ៦១ ក្បាល ដែលមានដូចជា ដំរីអាស៊ី Asian elephant Elephas maximus ៨ ក្បាល,ខ្លាធំ Sumatran tiger Panthera tigris sumatrae ៨ ក្បាល,ខ្លាឃ្មុំតូច Sun bear Ursus malayanus ៥ ក្បាល,ភេតូច Oriental small-clawed otter Aonyx cinereus ១០ ក្បាល,ស្កាតូច Small asian mongoose Herpestes javanicus ១០ ក្បាល,កាំប្រម៉ា East asian porcupine Hystrix brachyura ១០ ក្បាល,ពស់ថ្លាន់ធំ Reticulated python Python reticulatus ៥ ក្បាល,ពស់ខ្សែគោក្រហមត្នោត Oriental whip snake Ahaetulla prasina ៥ ក្បាល»។
សូមរំលឹកថា ចាប់ពីខែមករាដល់ខែមេសា ឆ្នាំ២០២២ កម្ពុជាទទួលបានភ្ញៀវទេសចរអន្តរជាតិសរុប ២៤១ ៤៨៥នាក់។ ចំនួននេះ គឺកើនដល់១៩១,៥ភាគរយ និងទេសចរផ្ទៃក្នុងកើនបាន១៦១,៥ភាគរយ បើធៀបនឹងរយៈពេលដូចគ្នា កាលឆ្នាំ២០២១។
តាមរយៈគម្រោងសួនសត្វនេះ នឹងក្លាយជា ទីកន្លែងមួយដ៏ទាក់ទាញ និងស្រូបយកភ្ញៀវទេសចរពីគ្រប់ទិសទៅកាន់ខេត្តសៀមរាប បន្ថែមទៀត។ យោងតាមទិន្នន័យនេះ ក្រសួងទេសចរណ៍វាយតម្លៃថា កំណើនភ្ញៀវទេសចរ នឹងអាចងើបឡើងលឿនយ៉ាប់ឆាប់ ចាប់ពីខែសីហា តទៅ។
ក្រៅពីគម្រោងសួនសត្វដ៏ធំបំផុត ខេត្តសៀមរាបក៏ធ្លាប់បានបញ្ចប់គម្រោងធំៗមួយចំនួន និងកំពុងបន្តគម្រោងដ៏ទៃផ្សេងទៀតដែលកំពុងតែងតែអភិវឌ្ឍន៏និងចេញជារូបរាងនៅក្នុង ខេត្តប្រវត្តិសាស្ត្រមួយនេះ ។ ជាក់ស្ដែង សៀមរាបបានបញ្ជប់គម្រោងស្ថាបនាផ្លូវ ៣៨ខ្សែ ដែលបានកែប្រែមុខមាត់ថ្មីនៃក្រុងសៀមរាប។ លើសពីនេះ សៀមរាបកំពុងត្រៀមខ្លួនទទួល ព្រលានយន្តហោះថ្មីដែលនឹងបញ្ចប់នាឆ្នាំ២០២៣ខាងមុខនេះ។
ការស្ថាបនានូវហេដ្ឋារចនាសម្ព័ន្ធនិងគម្រោងធំៗនេះ នឹងជួយទាក់ទាញការវិនិយោគ និងលំហូរទេសចរណ៍បន្ថែមទៀត មកទស្សនាខេត្តទេសចរណ៍វប្បធម៌ដ៏ល្បីល្បាញមួយនេះ។
ច្បាស់ណាស់ វាក៏ជាកត្តាមួយនឹងជួយបង្កើនសក្តានុពលទីផ្សារអចលនទ្រព្យ ហើយវិស័យអចលនទ្រព្យ ក្នុងខេត្តសៀមរាបប្រាកដជាមានការរីកចម្រើនខ្លាំងមែនទែន ជាពិសេសហាងឆេងដីធ្លីនៅតំបន់ជាយក្រុងក្នុងខេត្តសៀមរាប។
លោកអ្នកអាចស្វែងទិញ លក់ ជួលអចលនទ្រព្យជាង40,000 តាមរយៈគេហទំព័រ ឬកម្មវិធីក្នុងទូរស័ព្ទរបស់ Harbor Property ដោយសេរីនិងឥតគិតថ្លៃ៕