ស្ពានឆ្លងកាត់ទន្លេមេគង្គស្ទឹងត្រង់-ក្រូចឆ្មារបានឈានទៅជិតបញ្ចប់ការសាងសង់ហើយ
ស្ពានឆ្លងកាត់ទន្លេមេគង្គស្ទឹងត្រង់-ក្រូចឆ្មារបានឈានទៅជិតបញ្ចប់ការសាងសង់ហើយ
ដោយ វុត្ថា
ភ្នំពេញ: ស្ពានឆ្លងកាត់ទន្លេមេគង្គ តភ្ជាប់ពីស្រុកស្ទឹងត្រង់ (ខេត្តកំពង់ចាម) ទៅស្រុកក្រូចឆ្មារ (ខេត្តត្បួងឃ្មុំ) ដែលបានបើកការដ្ឋានសាងសង់ កាលពីថ្ងៃទី៩ ខែកុម្ភៈ ឆ្នាំ ២០១៨ ហើយគិតមកដល់ពេលបច្ចុប្បន្ន បានសម្រេចការសាងសង់ប្រមាណ៧៥,៧% ហើយ។ នេះបើយោងតាមរបាយការណ៍របស់ក្រសួងសាធារណការ និងដឹកជញ្ជូន ដែលគេហទំព័រ propertyarea.asia ទទួលបាននៅថ្ងៃទី២៥ ខែធ្នូ ឆ្នាំ២០១៩នេះ។
របាយករណ៍ដដែលបន្តថា លើសពីនេះក្រុមការងារអនុវត្តគម្រោង ក៏បានស្នើឱ្យក្រុមហ៊ុនសាងសង់បន្តយកចិត្តទុកដាក់ ធ្វើការសោចទឹកជាប្រចាំតាមបណ្តោយផ្លូវតភ្ជាប់ ដើម្បីកាត់បន្ថយផលប៉ះពាល់ (ដីហុយ) និងធ្វើការរៀបចំប្រព័ន្ធសុវត្ថិភាព(ស្លាកសញ្ញាចរាចរណ៍ ខ្សែចំណាំងផ្លាតការពារតាមជម្រាលជើងទេរ និងប្រព័ន្ធភ្លើងសញ្ញាបំភ្លឺពេលយប់)ឱ្យបានត្រឹមត្រូវនិងគ្រប់គ្រាន់ ដើម្បីធានាសុខសុវត្ថិភាពអំឡុងពេលសាងសង់ស្ពាននេះ។
តាមសភាពជាក់ស្ដែងនៃការសាងសង់នេះ ត្រូវបានកម្មករជំនាញ នៅក្នុងគម្រោងសាងសង់ស្ពាននេះបញ្ជាក់ប្រាប់ថា អាចនឹងបញ្ចប់មុនកាលកំណត់ នៅត្រឹមចុងឆ្នាំ២០២០ខាងមុខនេះ។
ស្ពានមិត្តភាពកម្ពុជា -ចិន ឆ្លងកាត់ដងទន្លេមេគង្គ តភ្ជាប់រវាងស្រុកស្ទឹងត្រង់ ខេត្តកំពង់ចាម និងស្រុកក្រូចឆ្មារ ខេត្តត្បូងឃ្មុំ មួយនេះ ត្រូវសម្តេចតេជោហ៊ុន សែន នាយករដ្ឋមន្ត្រីនៃកម្ពុជាអញ្ជើញបើកការដ្ឋានសាងសង់ កាលពីថ្ងៃទី៩ ខែកុម្ភៈ ឆ្នាំ២០១៨កន្លងទៅ ដែលវាជាស្ពានឆ្លងកាត់ទន្លេមេគង្គថ្មីមួយទៀត សម្រាប់តភ្ជាប់ទឹកដីនៃខេត្តទាំងពីរនេះ។
ស្ពានដែលបានកំពុងសាងសង់នេះ ចាប់ផ្តើមពីត្រើយខាងលិចស្ថិតនៅត្រង់ចំណុចភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម ឆ្លងកាត់ទន្លេមេគង្គ ទៅត្រើយខាងកើត ស្ថិតនៅភូមិក្តុលលើ ឃុំទ្រា ស្រុកក្រូចឆ្មារ ខេត្តត្បូងឃ្មុំ ។ ស្ពានមួយនេះមានប្រវែងសរុប ១,១៣១ម៉ែត្រ និងទទឹង ១៣,៥០ម៉ែត្រ ជាប្រភេទស្ពានបេតុងសរសៃដែក។
បើតាមគម្រោងស្ពាននេះ គ្រោងចំណាយថវិកាចំនួន ៥៦,៩៩៨លានដុល្លារអាមេរិក ជាហិរញ្ញប្បទានសម្បទានពីរដ្ឋាភិបាលចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ដោះស្រាយផលប៉ះពាល់ និងបោសសម្អាតយុទ្ធភណ្ឌមិនទាន់ផ្ទុះ៕
The post ស្ពានឆ្លងកាត់ទន្លេមេគង្គស្ទឹងត្រង់-ក្រូចឆ្មារបានឈានទៅជិតបញ្ចប់ការសាងសង់ហើយ appeared first on Best Real Estate News in Cambodia.
Source: Real Estate – property area