អ្នកជំនាញលើកទឹកចិត្តឱ្យអ្នកវិនិយោគធ្វើការអភិវឌ្ឍនៅតំបន់ជាយក្រុង
អ្នកជំនាញលើកទឹកចិត្តឱ្យអ្នកវិនិយោគធ្វើការអភិវឌ្ឍនៅតំបន់ជាយក្រុង
ដោយៈ រ៉ាណេត
ភ្នំពេញៈ អ្នកជំនាញ និងមានបទពិសោធន៍ច្រើនឆ្នាំ នៅក្នុងវិស័យអចលនទ្រព្យបានបង្ហាញពីគុណសម្បត្តិជាច្រើន រួមជាមួយនឹងការលើកទឹកចិត្តដល់បណ្តាអ្នកវិនិយោគនានា គម្បីចាប់អារម្មណ៍ និងជំរុញការអភិវឌ្ឍនៅតាមតំបន់ជាយក្រុងឱ្យកាន់តែច្រើន ខណៈដែលឱកាសនៃការទទួលបានចំណេញនៅមានអត្រាខ្ពស់។
បច្ចុប្បន្ននេះ មិនថាចំពោះតែគម្រោងអភិវឌ្ឍបុរីលំនៅឋានសមរម្យ លំនៅដ្ឋានតម្លៃមធ្យម ឬក្រោមមធ្យមនោះទេ គឺកមពុងតែបង្ហាញវត្តមាន រួមជាមួយសកម្មភាពពន្លឿនការអភិវឌ្ឍយ៉ាងខ្លាំងនៅតាមតំបន់ជាយក្រុង ដោយសារតែពួកគេបានសម្លឹងឃើញយ៉ាងច្បាស់ពីឱកាសដែលអាចទទួលបានចំណេញខ្ពស់។
អ្នកវិភាគសេដ្ឋកិច្ច និងជាអ្នកប្រឡូកនៅក្នុងវិស័យអចលនទ្រព្យ លោក ង៉ែត ជូ បានលើកឡើងថា ការវិនិយោគនៅតាមតំបន់ជាយក្រុង គឺមានគុណសម្បត្តិច្រើនជាងគុណវិបត្តិ “ចំណេញ ចំណាយពេលតិច និងអាចបង្កើតចំណូលអកម្មបាន”។
លោកង៉ែត ជូបានពន្យល់ថាគុណសម្បត្តិធំៗចំនួន៣ ដែលទទួលបានពីការវិនិយោគ និងអភិវឌ្ឍនៅតាមតំបន់ជាយក្រុង រួមមានដូចជា ទី១ ដឹងតែចំណេញៈ មិនខាតប្រសិនបើអ្នកមានផែនការហិរញ្ញវត្ថុច្បាស់លាស់ ពោលគឺវិនិយោគរយៈពេលវែង អាចរក្សាទុកនៅពេលទទួលបានតម្លៃល្អ និងមិនបង្ខំលក់នៅពេលធ្លាក់ថ្លៃ។ ជាទូទៅតម្លៃមានការកើនជានិច្ច ប្រសិនបើស្ថានភាពសេដ្ឋកិច្ច ទីផ្សារឬនយោបាយមិនល្អ គឺធ្លាក់ថ្លៃតែមួយរយៈប៉ុណ្ណោះ។
ទី២ ចំណាយពេលតិចៈ មិនចំណាយពេលច្រើន ដូចជាការធ្វើអាជីវកម្មដទៃនោះទេ អ្នកអាចធ្វើការយកប្រាក់ខែសន្សំជាទុនបណ្តើរ។ ឆ្លៀតចុះសិក្សាប្រមូលព័ត៌មាននៅថ្ងៃចុងសប្តាហ៍ឬថ្ងៃសំរាកបណ្តើរ។
លោកបានអនុវត្តវិធីសាស្រ្តនេះ អស់រយៈពេលជិត១៥ឆ្នាំ ឃើញថាមានប្រសិទ្ធិភាពខ្ពស់ ចាប់បានឱកាសល្អៗផង និងសន្សំបទពិសោធន៍ផង។ ខុសពីបើកអាជីវកម្មផងធ្វើការផងក្នុងពេលតែមួយ អ្នកនៅមានពេលផ្តោតធ្វើការងារបានល្អ ហើយអាចទទួលចំណូលពីប្រាក់ខែក៏ច្រើនគួរសមដែរ។
ទី៣ អាចប្រើប្រាស់ដីឬបង្កើតជាចំណូលអកម្មបាន៖ ប្រសិនបើសន្សំដីធ្លីបានច្រើន អ្នកអាចរក្សាទុកជាធនាគារដីធ្លី និងប្រើប្រាស់ក្នុងគោលបំណងនានា ដូចជា បង្កើតជាកសិដ្ឋាន សង់ឃ្លាំង ស្តង់លក់ទំនិញ អគារពាណិជ្ជកម្ម ឬការរិយាល័យសំរាប់ជួល។ល។
ស្រដៀងគ្នានឹងការលើកឡើងខាងលើនេះ អគ្គនាយកក្រុមហ៊ុនអចលនទ្រព្យ Khmer Foundation Appraisal លោកឧកញ៉ា នួន រិទ្ធី បានមានប្រសាសន៍ ការវិនិយោគលើវិស័យអចលនទ្រព្យ ជាពិសេសលើផ្នែកដីធ្លីនៅតាមតំបន់ជាយក្រុង គឺជាការសម្រេចចិត្តដ៏ត្រឹមត្រូវ ដែលមានឱកាសទទួលបានផលចំណេញច្រើន។
លោកឧកញ៉ាបន្តទៀតថា “ទោះជាពេលនេះសកម្មភាព នៃការវិនិយោគកំពុងតែមានភាពជ្រួលនៅតាមតំបន់ជ្រាយក្រុង ប៉ុន្តែបើចំពោះតម្លៃគឺនៅមានកម្រិតនៅឡើយ ហើយក៏នៅមានឱកាសទទួល បានផលចំណេញពីការវិនិយោគក្នុងកម្រិតខ្ពស់”។
លោកឧកញ៉ានួន រិទ្ឋីបានបន្តទៀតថា តំបន់ជាយក្រុងដែលកំពុងតែមានសក្ដានុពលនៅពេលបច្ចុប្បន្ន និងបន្តទៅថ្ងៃអនាគត គឺស្ថិតនៅទិសទាំង៤ព័ទ្ធជុំវិញរាជធានីភ្នំពេញ ជាពិសេស តំបន់ដែលស្ថិតនៅតាមផ្លូវជាតិសំខាន់ៗ ដូចជាផ្លូវជាតិលេខ១ ផ្លូវជាតិលេខ៣ និងផ្លូវជាតិលេខ៤ និងផ្លូវជាតិលេខ៥” ៕
The post អ្នកជំនាញលើកទឹកចិត្តឱ្យអ្នកវិនិយោគធ្វើការអភិវឌ្ឍនៅតំបន់ជាយក្រុង appeared first on Best Real Estate News in Cambodia.
Source: Real Estate – property area