អ្នកជំនាញអចលនទ្រព្យប្រាប់ចំៗកន្លែងកើបលុយពីការវិនិយោគដី
ស្របពេលវិស័យអចលនទ្រព្យកំពុងតែបន្តរីកចម្រើនជាបន្តបន្ទាប់ដែលធ្វើឱ្យតម្រូវការកាន់តែមានការកើនឡើងគួបផ្សំជាមួយវិនិយោគិនក្នុង និងក្រៅស្រុកបានបន្តបណ្តាក់ទុកយ៉ាងសស្រាក់សស្រាំដើម្បីវិនិយោគយកផលចំណេញពីវិស័យដែលកំពុងត្រូវប៉ាន់មួយនេះ ។
ប៉ុន្តែទន្ទឹមនឹងនោះផងដែរ ក៏មានការប្រកួតប្រជែងក្នុងការជ្រើសរើសទិញអចលនទ្រព្យជាប្រភេទដីធ្លីដែលស្ថិតនៅក្នុងតំបន់ល្អៗសម្រាប់ធ្វើការវិនិយោគបន្ត ព្រោះថាបច្ចុប្បន្នអ្នកវិនិយោគជាច្រើនបានព្យាយាមសិក្សាពីកត្តាសក្តានុពលនៃអចលនទ្រព្យគ្រប់ខេត្តក្រុងដើម្បីអាចបង្កើតឱកាសទិញរួចវិនិយោគយកផលចំណេញវិញ ។ តើសម្រាប់ទីផ្សារក្នុងប្រទេសកម្ពុជាបច្ចុប្បន្នគួរវិនិយោគដីធ្លីនៅតំបន់ណាទើបទទួលបានផលចំណេញខ្ពស់?
តាមប្រភពលោក ឡុង គឹមសួគ៌ អ្នកជំនាញផ្នែកអចលនទ្រព្យនៅក្នុងក្រុមហ៊ុនអចលនទ្រព្យដ៏ល្បីល្បាញមួយរូបបានឱ្យដឹងថា មិនថាទោះជាទិញនៅតំបន់ជាយក្រុង ឬនៅតាមបណ្តាខេត្តដែលឃ្លាតឆ្ងាយពីក្រុងនោះទេ អត្រាទទួលបានចំណេញនៅតែមាន ប្រសិនបើអ្នកទិញមានភាពឆ្លាតវៃ និងបានសិក្សាលម្អិតពីតំបន់ និងគម្រោងអភិវឌ្ឍន៍នានាដែលពាក់ព័ន្ធ ។
អ្នកជំនាញអចលនទ្រព្យខាងលើបញ្ជាក់យ៉ាងច្បាស់ថា ៖«ខ្ញុំនិយាយតែផ្នែកដីធ្លី មានអ្នកទិញទុកសម្រាប់វិនិយោគបន្តយកចំណេញ បានជ្រើសទីតាំងផ្សេងៗគ្នាជាមួយនឹងក្ដីរំពឹងថា អាចទទួលបានចំណេញនៅពេលលក់ចេញវិញ ។ មិនថា ពួកគាត់ទិញទៅទីណានោះទេ អត្រាដែលទទួលបានចំណេញគឺសុទ្ធតែមាន ឱ្យតែពួកគាត់ទិញដោយការពិចារណា និងវិនិច្ឆ័យបានត្រឹមត្រូវ» ។
លោកបានឱ្យដឹងទៀតថា អ្នកខ្លះគាត់មិនបានដឹងលម្អិតពីព័ត៌មាន និងគម្រោងអភិវឌ្ឍន៍ ដែលជម្រុញឱ្យមានតម្រូវការទីផ្សារនោះទេ ហើយទិញតាមគេផ្អើល តែក៏អាចទទួលបានចំណេញដូចគេ ដែលការចំណេញនេះ វាគឺជារឿងចៃដន្យសម្រាប់គាត់។ ចំពោះករណីបែបនេះមិនមែនចេះតែទទួលបានរហូតនោះទេ ។
លោកបានបន្ថែមឱ្យដឹងផងដែរថា មានអ្នកខ្លះគាត់មានធនធានតិចតួច ប៉ុន្តែគាត់បានសម្រេចចិត្តឥតស្ទាក់ស្ទើរ ក្នុងការទិញដីនៅជាយក្រុងទុក ជាពិសេសនៅក្បែរគម្រោងអភិវឌ្ឍន៍ដែលមានសកម្មភាព ដូច្នេះភាគរយចំណេញរបស់ពួកគាត់គឺមានច្រើន ហើយរហ័សទៀត ។ ប្រសិនបើពួកគាត់សម្រេចលក់ ក្នុងតម្លៃចរចាណាមួយដែលអាចទទួលបានចំណេញ ហើយយកទៅវិនិយោគនៅតំបន់ណាមួយផ្សេងទៀត ដែលមានគម្រោងអភិវឌ្ឍន៍ច្បាស់លាស់ នោះកំណើននៃភាគលាភរបស់គាត់ នឹងកើនឡើងច្រើនជាងអ្នកដែលមានលុយច្រើនដែលទិញដីទំហំ ប៉ុន្តែនៅតំបន់ឆ្ងាយពីទីប្រជុំជន និងមិនមានគម្រោងអភិវឌ្ឍន៍ ។
លោកបានបញ្ជាក់ថា មិនថាទោះជានៅតំបន់ជាយក្រុង ឬនៅក្នុងខេត្តណាមួយនោះទេ ភាគរយចំណេញនៅតែមានដូចគ្នា សំខាន់ត្រង់ថា មុនពេលទិញសម្រាប់ទុកវិនិយោគ ត្រូវតែចេះសិក្សាពីតម្រូវការទីផ្សារ និងគម្រោងនៃការអភិវឌ្ឍឱ្យបានគ្រប់ជុងជ្រោយយ៉ាងលម្អិត ទើបការវិនិយោគមិនជួបភាពបរាជ័យ ៕